أسامة غانم يكتب.. حاجة غريبة

حاجة عجيبة وغريبة فى مصرنا الحبيبة .. شباب كتير عاطل مش لاقى فرصة عمل .. مصانع كتير بتصنع ألبان وملابس وأجهزة كهربائية وبتطلب أيادى عاملة مشلاقية حد يتقدم.. وأصحاب المصانع بيستوردوا أيادى عاملة من بره! ده فى شركات بتجيب
العمالة الآسيوية والمصانع معلهاش مسئولية إلا الراتب الذى تتفق عليه مع شركة توريد العمالة.

ما شاء الله العمالة الآسيوية بكل نشاط ولا يشتكوا من كتر العمل أو مكان النوم. ولا واحد يقول عندى ميت خالتى ولا عمتى ماتت ويغيب ولا يزوغ من رئيس الوردية ولا يقوم يتوضى قبل الآذان بساعة ويصلى فى ساعة.. وفى رجال الأعمال عاوزين عمالة مصرية يدربوهم بره بس العامل يمضى على عقد مدته خمس سنوات مشمول بشرط جزائى يمشى العمال وميروحوش حاجة غريبة وعجيبة .. ميعدلهاش مشايخ يوم الجمعة ولا قساوس الكنائس يوم الأحد لأن أولياء أمور هذه الشباب مش متابعة أولادهم لأنهم مش موجودين أصلاً.. والأغرب واللى مخلينى فى قمة الغيظ أن بعضهم بيدفعوا لأولادهم بالآلاف ويغرقوا ويموتوا ولا يتنصب عليهم عشان يطلعوا بره يشتغلوا أى حاجة ومصر أصبحت لا فيها فلاح ولا صنيعى فى أى صنعة وعجبى.