بقيت مكتوب فى الكشف قتيل
كان بدرى عليا يامه القتل
كان نفسى أعيش إنشا الله قليل
وأفضل حبه بين الأهل
أدخل كُتابى ومدرستى
وأحضن أصحابى وكراستى
وأبقى من شطار الفصل
كان نفسى ألعب فى الميه
وأجرى ع الشط بحرية
وأبنى عش جميل بالرمل
بناية عش برمل ع الشط ذنب كبير
حيفوت فايت منحط ياخدنى أسير
وأفضل فى الأسر
لحد ما أبقى شوية كسر
وأرجع للأهل كهل
مليش تأثير
كان نفسى أتجوز سعدية
أم العيون العسلية
وأبنى لها قصر كبير
وأبقى المالك وأشيل السلك الشايك
وم الفرحة أطير
أجيب الشبكة وأرقص دبكة
وأجرى فى الشارع الواسع
من غير خوف من أى دخيل
والموقف سهل
لو عشنا أهل فى أهل
واتلموا الإخوة ونبذوا الفرقة
وظهر الوجه جميل
ونعود للأصل ويعود الوصل
وتعود الأرض ونعيش مع بعض
فى أجمل قصر
فى أى مكان فى فلسطين
مشاركة
اضف تعليقاً واقرأ تعليقات القراء
مشاركة
