أحمد صلاح محمود يكتب: ده مش حب.. ده دور أنفلونزا

ليه قصص الحب فى الزمن ده لا تعيش يا دوب تبدأ عشان تلحق تخلص فى السريع مفيش وقت.. بجد حاجة غريبة جداً بسمع من أصحابى قصص غريبة يسمونها قصص حب أو هكذا يعتقدون، وحين تسأل عن عمر ما يحكى عنه أو تحكى عنه تسمع إجابات تجنن تسمع شهرين أو شهر ونص وأحياناً أقل ويدعون أنهم عشقوا وأخلصوا وأنهم غرقوا حتى كادوا أن يموتوا فى الحب وأنهم صادقون وجادون وأنهم حتى آخر لحظة ما باعوا وما خانوا ويلقون بلا تفكير كل الاتهامات على الطرف الآخر الذى لم يقدر ولم يثمن هذا الحب الذى كان.

ولما تقول "يا جماعة حب إيه وما تحكون عنه ليس حب ومستحيل ان يكون" تتهم بأنك معقد وعايش فى الأوهام وأخرك فى الحب حب أفلام الأبيض وأسود إيش عرفك أنت فى حب اليومين دول حب الكايفيهات والفيس بوك.

للأسف أصبح الحب لدى الكثيرين نوع من التسالى وشغل أوقات الفراغ وقضاء وقت يتصورون وهماً أنه جميل فى فسح وخروج ومكالمات تليفونية ورسائل محمول.

حب من غير حب، حب بدون أساس أصبحنا نتعامل مع معنى الحب بحالة من الاستخفاف واللامبالاة وعدم التقدير وندعى أننا نحب بصدق ونسينا أن الحب فى الأساس مسئولية ومشروع حياة
نعم حياة، وحياة كاملة بكل ما فيها من عطاء ونبل وتضحية وصبر ونجاح وفرح وألم وسعادة وحزن حياة من لحم ودم ومشاعر وإحساس وكل الصفات الإنسانية، أما تحكون عنه ليس حباً على الإطلاق وستأتى لحظة تدركون فيها معنى ما أقول وما أقصد، لأن ده مستحيل يكون حب، ده بالكتير قوى دور برد.