على وش البرتيته
ولد الكتشينة .. بتعايق
غيطان الليل ف أيده
فتل نهار أحب حبيبه
بدر البور نسايم
بأيده غرب وجع البنية
ونخل مقطوع شواشيه
عشش حمايم
وما يلوم عليا لايم
شق جار شق
كنت ألم وأخيط
لو حجل كان ضهره طق
لو جبل كان زمنه عيط
........
ولا جانى قلب قدام الرحيل
اتبرى
كنت أخبيها ف حجر الليل
وافوت أنا يطولنى
بكره
...........
ولا شارى الهم انا
ولا قلبى عليه
سديت جوع الطنابير بعمري
منابين المر مدغت وحدي
وان كلنى وجعي
أضحك .. أغصب قلبي
واضحك فين
.............
وفوق العالي
علمت غرامك للطير والنبات
عملت اسمك للقمر أسامي
ليه بقى مفيش مطرح ف عينك ابات
وقلبك ع كى رمشك كواني
حرمت مطرح .. ما اطبطب
أعود واطبطب .. تاني
ماليش عازه
وف أخر الدور محروق
كعود حطب
على وش البرتيته مرمي
على مين بس ارمى العتب
دانا يوم ما جيت ع قلبى معاك
فوتنى بطولى
روّحَى
مشاركة
اضف تعليقاً واقرأ تعليقات القراء
مشاركة
