د.طارق النجومى يكتب: دكتور..الحقنى..المغص جوا فى بطنى!!

ألف مبروك يا دكتور.. يتربى فى عزك!!.. وجدنا الرجل متجهماً وحزيناً؟.. الواد نزل عنده صفرا وفين على ما لقينا له حضانة فاضية فى مستشفى خاص.. دخلناه وربنا يستر!!.. طيبنا خاطره ونزلنا مسرعين.

أيه رأيكم.. فيه كافتيريا قريبة على النيل.. بلدى شوية.. بس قاعدتها حلوة وأسعارها معقولة.. جلسنا وبدأ البعض فى تدخين الشيشة والبعض الآخر فى شرب القهوة!!

شيشة والله إنتوا دكاترة مسخرة.. يا عم خليها على الله.. دكاترة إيه.. هو أنت فاكر نفسك دكتور بجد!!.. أمال إحنا إيه يا جدع إنت.. يا عم ماتحبكهاش.. هو فيه دكتور بياخد الملاليم اللى إحنا بنقبضها كل شهر.. تلاقى مرات الراجل باعت حتيتين دهب علشان تدخل الواد الحضانة.. الله يكون فى عونه المرتب ما بيكفيش أجرة الشقة وشغله فى المستوصف طول النهار يادوب بياكل بيه هو ومراته والبنت!!

طيب ما كان فاتحله عيادة يمكن كان ربنا رزقه.. عيادة إيه يا عم الناظر!!.. هو أنت علشان فاتح عيادة فى الكفر فى بيت جدك مش مكلفاك أبيض ولا أسود.. فاكر فتح العيادات بالساهل!!.. أنا أبويا باع حتة أرض زراعية كان وارثها وأدانى تمنها فتحت بيه عيادة.

والهم اللى يبكى فى يوم ألقيلك واحد داخل العيادة شايل شنطة وماسك قلم وقاعد يعد فى الكام عيان وقرايبهم اللى قاعدين.. مين أنت يا أخينا.. قال مأمور ضرايب.. كنت عايز أنط فى كرشه.. ضرايب إيه يابا هو أنا عارف أكل عيش.. يا عالم ارحمونا مش كفاية أنى مابشوفشى عيالى طول النهار ومش كفاية الضرايب اللى بتخدوها من المرتب.. يعنى نعمل إيه.. نشحت؟

لا.. ماتشحتش ولا حاجة.. فرجت!! نقيب الأطباء.. الله يباركله.. خد لنا فتوى.. أننا نستحق الزكاة وعمل صندوق صدقة.. يلم فيه زكاة الدكتاره الكبار.. ربنا يسترهم!!

كبار مين يا عم.. ماتخلنيش أضحك.. ابنى تعب.. وديته عند واحد منهم.. خد الكشف وطلب 8 آلاف جنيه تكاليف عمليه للولد.. راح فين ميثاق شرف المهنة اللى بيقول إن الدكتور ما يخدشى أجر من دكتور زميله ولا من أهله؟.. طيب قبل مايزكوا علينا ماحدش منهم يمد أيده لواحد غلبان مننا وياخد الكشف!!

يا عم إيه المسخرة دى!! إحنا لنا حق.. وحقنا أن بعد ماطفحنا الكوتة سنين طويلة فى الدراسة وشفنا المذلة فى الدراسات العليا أن مرتبنا نعرف نعيش منه.. بقى بعد غلب السنين الطويلة دى هنمد أدينا ناخد زكاة.. يا أخى لا عاشت ولا كانت!!

يا راجل الحكايه كلها تمثيلية.. هى المستشفيات اللى إحنا شغالين فيها دى مستشفيات.. دا اللى داخلها مفقود!! المستشفى المركزى اللى أنا شغال فيه.. الطوارئ بتاعته ماتنفعشى لعلاج البنى آدمين.. لا إمكانيات.. ولا أجهزة.. ولا نظام ولا غيره بس الحكايه منظر وخلاص.. دكتور قاعد وفى أيده سماعة!!

والناس بس فالحة تطلع غلها فى الدكاتره والممرضات الغلابة.. بدل ما تروح تطالب بحقوقها من المحافظ ولا رئيس المجلس المحلى ولا من كان من يكون!!

يا عم ماتلومشى الناس الغلابة.. ما إحنا أهه ما فلحناش نطالب ولا ناخد حقوقنا!! وبعدين محافظ إيه اللى فاضى للصحة وللعيانين.. كفاية عليه فريق الكورة اللى طلع الدورى السنة اللى فأتت.. يا راجل خليك منطقى.. فيه أولويات!!

عندك حق هو إحنا لو كان لنا قيمه كان ده بقى حالنا.. ده مرتب الكوتش بتاع الفريق.. يقبض المستشفى كلها بدكاترتها بممرضينها!!

يا عم قول يا باسط.. الناس الكبار فى الحكومه يحسوا بينا ليه.. لو كانوا زيهم زى الناس الغلابة وبييجوا يتعالجوا فى المستشفيات اللى هما فاتحينها.. كانوا عرفوا أن الله حق.. لكن دول بتتفتح لهم الاعتمادات بالملايين اللى متاخده من جيوب الناس اللى زينا ضرايب.. وسكتهم سالكة على أوربا وأمريكا منها علاج ومنها فسح وشوبنج يا مونشير!!

يا راجل ما تفكرنيش.. دنا انقهرت لما شفت اللى بيكتب فى الجرايد عن العلاج على حساب الدولة اللى المفروض يكون للناس الغلابة..!!! والملايين اللى اتلهفت من العالم اللى فوق.. ولا حسيب ولا رقيب!!

تصدق بالله.. أنا مش فاهم يعنى ايه العلاج على حساب الدولة!! يعنى المفروض العلاج يكون على حساب مين؟ مش الحكومة مسئولة تعالجنا وتعلم ولادنا.. أمال بتدينا مرتب ملاليم ليه.. وفى الآخر خالعة ايدها وسيابه كل واحد يصرف نفسه!

الموبايل بيرن.. بتقول إيه.. مات.. لا حول ولا قوة إلا بالله.. الواد مات فى الحضانة.. والمستشفى حجزاه لغاية ما أبوه يسدد الفاتوره.. لا حول الله.

طيب يا جماعة نلم من بعضنا ونحاول نساعد الراجل.. تلم من مين يا عم!!.. كل اللى معانا مش هيكمل وبعدين هنقعد نشحت بعد كده.. طيب.. وإيه العمل؟ خلاص خلاص.. لقيت الحل.. الصبح من النجمة هكون قدام باب النقابة وعلينا وعلى صندوق الزكاة.

وهنا يظهر شخص.. حسنة لله.. أى حاجة يا بهوات.. ربنا يخليكم.. روح بعيد يا راجل أنت.. ربنا يسهلك.. يعنى أنت هتيجى على الراجل الغلبان ده.. خلاص يا حاج.. استنانى على باب النقابه بكره الصبح.. نقابة إيه يا سعادة البيه هما الشحاتين لهم نقابه؟.. لا يا حاج.. نقابة الأطباء.. ويجعله عامر.

وينطلق صوت الراديو.. ماتقولشى إيه أدتنا مصر.. قول هتدى إيه لمصر.. يا.. يا.. يا حبايب مصر.. حبايبناااااااااااااااااااااا !!!!!!!!!!!!؟؟؟؟؟؟؟؟؟؟