رغيف العيش صبح غاية وكل الناس بتــــــــتمنا
ولجل تنولوا ويايا طابــــــــور ف طابور هتستنا
شهادة الجيش ويلزم فيش وكام صوره تجبهالنا
ونبقى نشوف قريبك مين عشان تاكله وتتـــــهنا
وأصل اللقمة يابن الناس مهش بالسهل تلاقيــــــها
ولازم تندعك تنداس عشان بسلامته حاميــــــــــها
ولازم تشتغل بالفاس عشان يمكن يجود بيـــــــــها
وتتشقلب قصاد الناس وتمسح جوخ لعاطـيـــــــها
وايه ذنبى أجوع واتهان وأروح وامدح فـ راعيها
وأبات وأصحى بهم القوت وأبارك مستبديــــــــها
وليه القسوة يابلدى وليكى روحى بفديـــــــــــها
تخلينى أخاف وأهرب وغيرك خيرى أديـــــــــها
فـ غربة ولدَت همى ونزلت دمعتى فيـــــــــــــها
وأرضك هان لها دمى وبخلت باللى فـ اديــــــها
وليه الظلم يابن الناس بقى مكتوب على قوتـــــــــــــك
وفى بلدك تطاطى الراس وصوتك يخرسو سكوتــــــك
وقبل ماتتولد تلقاه بيستعجل قوام موتـــــــــــــــــــــك
وأنا لا لى فـ المجلس ولا الكرسى ولا الأحـــــــــــزاب
وكل منايا ياريس رغيف العيش يدق الـــــــــــــــــباب
وعايزة حاف أنا راضى وهعملوا بقلبى حــــــــــــجاب
وهمسحها دموع أمى وأسود شعرها اللى شـــــــــاب
تودعنى وأنا خارج بدعوة قلبها اللى طـــــــــــــاب
وأروح اهتف ومش خايف من اللى عض قوتى وغاب
وخلى مصر ياريس ... بقت مـ الظلم تانى خـــــــــراب
وعين الغدر ترصدنى وتتوعد بألف عقـــــــــــــــاب
وفى لحظة أنا عارف راح اطفى بس زى شـــــــهاب
وفركش كله راح يجرى ويتخفى ف حضن البــــــاب
ويلمح وشى فـ النشرة وجنبه ........يسقط الأرهاب
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة