هالة أحمد الزقم تكتب: سطـــــور العــــــمر

بنكتب سطرْ
و نمسح سطرْ
يعدّى العمرْ
و نلقى كِتابنا
صارْ فاضى

سنين بتمرْ
ويوم بِيجُرْ
فى أمس يِفُرْ
وأبات وأصحَى
وأنا راضى

نهار بعتّرْ
ف حلم أخضرْ
يِبِسْ مَرّرْ
و لسّه حرُوفُه
بتنــــــادِى

وأحاسبْ مِينْ
وأشكى لِمينْ
وأطبطَبْ فينْ
وأجْلِدْ فينْ
ده جُوّه القلبْ
ميتْ وادِى

وأحاولْ ألـِّمْ
حروف الحلمْ
وأسرسِب همْ
وأرسم رسمْ
أجمَّع لونُه
م الماضى

أهى نقطة
وكمان نقطة
بانَت لقطة
صَبح منظرْ
لكن باهِت
ومِتكرَّرْ
وعُمر الفنْ
ما يـأثـَّــرْ
مادامْ عادِى

يجُوز بكرة
تثـُور فكرة
ف روحْ
ريشـــةْ
ف ايد حرّة
تعدِّل خطْ
تلوِّن شطْ
تِشِيل و تِحُطْ
تحرَّر عمرْ
عاش مسجونْ
ف زنزانة
برىء راضِى

وإيه بيدومْ ؟
وإمتى بكرة
كان معلومْ ؟
ومين يعرف
قضا القاضى؟