أحمد صلاح محمود يكتب: أنا بحبك.. مين قال؟

أنا بحبك.. مين قال؟!
ولا أقولك جايز
والله ما أنا عارف
أنا بقالى فترة مش مركز
وفاصل شحن ومش شايف
ومن كل شىء جانبى خايف
قافل على باب أوضتى
ومش فاكر حتى اسمى
يبقى ح أفتكر اسم حبيبتى

عارفة عيبك إيه؟
عيبك إنك بتصدقى حب الروايات
وأن البطل ح يخطف البطلة
ويعيشوا ف تبات ونبات
ويخلفوا صبيان وبنات
صدقينى يا حبيبتى كل ده خرافات
والحب الحقيقى غير حب الحكايات
بس انتى متأكدة انى قولت لك بحبك؟
جايز بس إزاى
وأنا من سنين ف حالى
وبطلت أكتب عن الحب
وأحكى عن أحواله وأحوال القلب
وأقول العيشة من غيره مستحيل.. صعب
ولا حد سمع كلامى
وقالوا طيب وسابونى
قال إيه غارق ف أحلامى
وبعد ما نسيت القضية
راجعة دلوقتى ليه
تقولى إنى بحبك
وإنى بتصل كل ليلة أقولك
جايز
والله ما انا عارف !!