توفيق المصرى يكتب: على الشاطئ

يابحر بعيدة قوى شطئانك، على مدى الشوف مش شايف غير لونك. عميقة أغوارك ، تمتعنا، ترهبنا . تخفى عنا أسرارك، فى السطح أمواج وهدوء فى العمق غموض وكنوز وممالك.

كل الأنهار روافدك يابحر، تتجه نحوك ، فيك تصب، تذوب وتتبخر.
مياهك يابحر مالحة مش للشرب لكنها صالحة للإبحار لولاها كان اتغبر الطقس وصار بلاأمطار.

سكانك يابحر عائلات وأنواع لا تتعد. ضخم وكبير وصفيرمسالم ووغد. منهم لو ساب مياهك هلك ومنهم البرمائى اللى يعيش فى الماء والأرض.

اللى على البر عوام، اللى على الشط شاطر. مش كل اللى ركب حصان خيال ولا كل من كان فى قارب بقى من رجال البحر، عشان تتعلم العوم لازم تعوم. تنزل الميه، دراعك يضرب بقوة يشق كل موجة عالية ويمر. تطلع قوى كسبان ياللطول والعرض، اللى عايزكنوز لازم يجاهد بكل عزمه عشان يقدر . لازم يغوص للعمق وربنا ينصر.

قاعد على شط يحر الرؤية قدامى ممتدة. أشوف أتأمل بروح فكرى وخيالى أبعد مما أتصور. أحيانا يهدأ السطح، لحظة تعلا أمواجه.. تعلا وتعلا وعند الشط تتكسر. تقرب مياهه وتبعد تسحب اللى فى سكتها.. تغدر.

أمانه يابحر الحياة ترحم وتترفق، تدينا فرصة ناخذ نفسنا نستنشق. دا الهوا فيك دايب واللى فيك يتخنق يغرق، لكن على الشط الهوا.. ينعش يفوق. نفسى يابجر أرسى على مينا. أشوف أولى من أخرى وأنادى أهلى وجيرانى تعالوا نتفوق. دا العيشة ع البر حلوة مريحة لكن بين الموج.. تفرق.