فيسبوك
واتساب
آه يا زمن القرش يا أبو كرش
أساسك بور وزور وكلك غش
وزمم خربانة وناس جعانة مالاقية المش
وناس يا خسارة قدام الفلوس ضمايرها تكش
زمن ملعون زمن اليوتيوب والفضائية زمن الدش
زمن الداتا والساتا والصاعق علشان ماتهش
زمن بايع زمن بالع كل غالى زى الونش
آه يا زمن معيوب يا ضلالى كل كلامك هتش فى هتش
وآدى خريج هندسة وتجارة وحقوق وآداب قاعد بينش
وأشى أمية وأشى طائفية وتعددية وروشونا روش
والبصمجية باعوا الهوية حلقوا سبايكى وشبعونا نتش
والبلطجية حسموا القضية وشبعنا أزية وبطش
والناس اللى هيا اللى معدية باعوا تاريخنا فى الكلتش
ودول سبقونا وضحكوا علينا هما بيعلوا واحنا نكش
فين علمنا فين اختراعتنا فين ثورتنا ضد الهبش
فلوس بالفايظ زى مانت عايز وتعليم بايظ ومناهج دش
فين شهامتنا فين عزتنا فين حضارتنا ضاعت يا كوتش
جهل واهمال ومحدش شغال والنهار شادد الرحال والعتمة هتخش
كله هات عايزين جنيهات من غير تعب ومجهودات واسرق وقش
وجرانديزر وعيش كيزر وديسكو تك وعالم وش
فين القيمة وفين السيما فين الفن وسط الرتش(المهملات)
وناس مريضة حالتها عيضة جوه النفس تحش
وناس بايعة وشباب ضايعة ونار والعة فى القش
آه يازمن هرمك مقلوب زمن المسخ وقرون الكبش
شمس بكرة جايه والحرامية المهلباتية هيناموا على البرش
والمنافق والمرافق والوصولى أبو ألف وش
أوعى ساير اسبق شاور ناقش حاور اتحدى وعدى المنش
عيش بأمانة أو موت بكرامة صحى ضميرك وميهمكش
عمرك واحد وربك واحد خليك راجل واوع تكش
اوع يهمك اوع يغمك لسة كثير على آخر الماتش
