نصر الدين سالم يكتب: بحبك يا بلدى

مين بيحب مين اكتر
مين بيود مين اكتر
مين بيدَى للتانى
مين يبعد ويتأثر

مين يبعد ويتهنى
ومين عنك بيستغنى
ومين فى العشق يتـأنى
ومين فى تاريخه بيشرف
ومين لسه بيتعرف
ومين فى خواته بيقدر

كلمة أحبك وعاشقك قليل
لأن انتمائى لاسمك دليل
واحبك غروب فوق النخيل
واحبك شروق ونيلك يعبر

تب مين فاكر ومين ناسى
ومين شايلك على دماغه
ومين عايش وبيآسى
ومين بيسن فى أسنانه
ومين سايق فى دلاله
ومين هرب فى أمواله
ومين عايش كده فى حاله
ومين يسهر يريحنا
ومين ينتج وبيطور
ومين فرق فى لمتنا
لما حيتان البحر أكلتنا
ويجرى يهرب ويتسلل
ومين يفرح فى ميتنا
ومين غير فى لغوتنا
ويمشى يسرق ويتعلل
ومين ياكل الشوك
ومين بالشوكه ياكل التينه
ومين يحصد ومين ياكل
ومين بيحل فى مشاكل
ومين يغرسنا فى الطينه
ومين عايش ومتواضع
ومين عاالعيشه متكبر
ومهما انا أتعب
وأخزن وأغضب
مش اقولك أنا زعلان
أنا لوحدى انا الغلطان
وأقولك وانا فرحان
لا يمكن فى لحظه هتهونى
واحبك تكونى أد ما تكونى
وأكبر فى صورتك
واصور واكبر
ومين عايش ومتواضع
ومين على العيشه متكبر