أحمد مصطفى الغـر يكتب: فيلم عربى

إزاى تعرف إنك بتتفرج على فيلم عربى؟.. شوف الإجابات وتأكد منها بنفسك.

عندما يكون البطل مريضا وتقدم له البطلة حبة الدواء مع كوب ماء وبعد أن يبتلعها وتسأله البطلة فورا: ها عامل إية دلوقتى؟ المفاجأه أنة يرد عليها: الحمد لله بقيت أحسن
كده بالسهولة دى.. هو واخد حبة البركة ولا إيه؟.
*******
عندما يصل البوليس إلى موقع الجريمة دون أن يبلغه أحد
*******
عندما يصاحب مشهد التغرير بالبطلة لقطات الأمطار الغزيرة والبرق والرعد والشباك الذى ينفتح بقوة على مصراعيه
وتلاقى البطلة فى الفيلم مصيّفه
*******
عندما يكون الوقت ليلاً، وفجأة عند خروج الممثلين من داخل البيت اللى هما كانوا فيه، تلاقى الدنيا نهار، ويستمروا فى ادعاء أن الوقت ليلاً
*******
عندما تقول البطلة للبطل أنها حامل فيرد البطل على طول.. اللى فى بطنك ده لازم ينزل، حتى لو مش ابنه
*******
عندما تفاجئ بأغنية فى منتصف الفيلم، بدون أى داعى، وأحيانا لا يكون هناك علاقة بين كلمات الأغنية وأحداث الفيلم
*******
عندما يكون من المستحيل أن تجد الهاتف مشغول والطرف الثانى يرد من قبل ما النمرة تجمع ولا تدى جرس حتى
*******
العبارة الساذجة الشهيرة التى تصطحب مشهد القبض على المجرم: مفيش جريمة كاملة وانت فاكر إنك هتهرب من البوليس بعملتك دى
*******

فى بعض الافلام يقول البطل: (خمرة و العياذ بالله) وبعد شوية ياخد الكاس ويشربه كله، و تبقى المشكلة وقتها إن الخمرة طعمها مش حلو
*******
عندما يخرج الطبيب من غرفة العمليات يرد جملة من ثلاث جمل
اضطرينا نضحى بالجنين.. شدو حيلكوا يا جماعة.. العمليه نجحت بس مش هتقدروا تشوفوه دلوقتى
*******
عندما يجلس البطل والبطلة فى نفس الكازينو بتاع كل فيلم ويطلبوا نفس العصير اللى فى كل الأفلام والمسلسلات
يخلص المشهد من غير ما حد يشرب حاجة
تقريبا علشان هيتصور بالمشاريب دى فيلم تانى
*******
عندما يصاب البطل بطلق نارى فى قلبه وتنزف الدماء من بطنه زى صلصة الكشرى ويظل يتحدث بطلاقة وتركيز لمدة خمس دقائق يقوم خلالها بفك لغز الفيلم والإعلان عن القاتل الحقيقى أو البطل يبقى ابن مين

فى بعض الأفلام بيفضل صاحى لحد لما يقول وصيته، ويسلم على كل ولاده، وأوقات تانية كمان لحد ما يوصل الدكتور علشان يقول إنه مات
*******
عندما تجد مقر العصابة ملئ بالقش والبراميل الخشبية
و طبعا موجود كوتشينة أو السلم والتعبان أو أى لعبة علشان يلعبوها
*******
عندما تسمع صرير احتكاك كاوتش العربيات اللى بطارد بعض وتقريبا بتبقى عربيات قديمة جدا وتسير بسرعة 30 كيلو.
*******
البوليس دايما بيوصل لما البطل يكون ضرب كل الأشرار، وساعات البطل هوا اللى بياخد المجرمين لحد قسم الشرطة، توفيرا على البوليس
*******
دايما يكون الفلاح أو الصعيدى شخص قليل الفهم أو المعرفة، و إن سكان القاهرة هما الأكثر فهما، مع أن العكس هوا اللى صحيح
********
لما واحد يجى يضرب واحد تلاقى المؤثرات الصوتية، مش أصوات ضرب أشخاص، غالبا بتكون أصوات مدافع أو تصادمات بين مدرعات، ويرجعوا النقاد يقولوا: أصل ده أكشن يا جماعة
******
فى النهاية يبقى أن أقول: إن من الظواهر السيئة جدا فى أفلامنا العربية هى سرقة أفكار الأفلام الأجنبية وإعادة تمثيلها بممثلين عرب أو مصريين فى منتهى السطحية و التفاهة.. و اللجوء إلى العرى والمشاهد الخادشة للحياء والألفاظ البذيئة والغير أخلاقية وهذا كله تحت شعار الفن .. رغم أن الفن برئ من كل ذلك.