أحمد صلاح محمود يكتب:محمد منير مساء الخير يا أسمرانى

وأنا صغير مكنتش غاوى غنا بالكتير قوى أسمع أغنية لو جت بظروفها فى التلفزيون أو الراديو إنما أنزل اشترى شريط ده كان صعب شوية لحد ما سمعت منير بيغنى الحب زى الطيور رحت فى عالم تانى من السحر والدهشة والجمال عالم صنعه ذلك الساحر الأسمر بحنجرته الماسية وصوته الملائكى بجد منير صعب قوى تسمعه ولا تشعر بفرق لازم يسيب فرق وعلامة لا تمحى من السحر فى قلبك أنا هنا مش بتكلم عن مشوار منير وغنى كام أغنيه وقدم لنا كام البوم مش بعمل إحصائية أنا بحاول أتكلم عن تلك الحلة الرائعة من التوازن النفسى التى نصبح فيها ونحن بصحبة منيرعن السحر الموجود فى عشق البنات والأمل فى ربك لما يريد والرومانسية العذبة فى لما النسيم والتحدى فى على صوتك بالغنا
بحس ان منير دايما مش بيغنى والسلام منير بيغنى لما يكون فى رسالة عاوز يقولها حالة عاوز يعبر عنها مشكلة بيقدم حل ليها هنا يصبح الغناء ضرورة وواجب مش ترفيه واستمتاع وحسب
كل أغنيه لمنير حالة إبداع بمفردها حالة بتعبر عن حاجات كتير قوى جوانا.

ودى مهمة الفنان الأولى أنه يعبر عن مشاعر الناس ويقول اللى الناس محتاجة تقوله وتسمعه منير مشروع غنائى شامل غنى للحبيبة وللوطن غنى للناس والحياة.

حسيت ان له كتير قوى عندى يكفى ما منحه لى من فرحة وسعادة وإلهام يبقى مش كتير أبدا إن أقوله شكرا وربنا يسعد أيامك ومساء الخير يا أسمرانى