أحمد عبد العزيز يكتب: الضريبة العقارية

ليه بنسأل ع اللى صار
واللى خطط واللى شار ؟
فيها ايه نعمل جدار
أو نضيّق فى الحصار
أو نقول بحمامة بيضه
راح نوقف الدمار
همه أدرى باللى جِارى
واللى جاى بعد انتظار
بس تعمل ايه يا جَاري
وانت لايص ليل نهار
فى سياسة حزب حاكم
فى معارضه تجيب مرار
بين بيان... وبيان معارض
دوخوك... ومفيش قرار
الحقيقة ما عدت عارف
حاسس انى بقيت حمار
يعنى مسموحلى إنى ارفس
كل غالى ومستعار

****
والنهارده سمعت واحد
جه يقول عايز اتاوه
ع اللى قاعد
واللى راقد
واللى جاى بيبيع غناوه
واللى قاعد خلف بابه
واللى عنده بقيه باقيه
من جماله ومن شبابه
والحكومة الله يعينها
عمله عفو للى شابه
ربنا يخلى جنابه

****
اللى سب الدين وهان
اللى فبركها الشيطان
اللى قاعد للمواطن
يمضغه زى اللبان
اللى هببها سيادته
جه يقولك فى البيان
القانون موضوع عشانكم
آه عشانهم ...!!
بالحقيقة اظهر وبان

*****
يعنى لو عندك خرابة
تعوى حواليها الديابه
والمرافق بُعد كيلو
والديون قاعده تناديلوا
والزراعة تشد ديله
المعاينة تجيك تغنى

آدى دقنى ان شفت منى
عفو ع القصر اللى عندك
ربنا يا ناس يعنى
ع اللى بالدستور ظالمني
واللى بالدستور قاتلني
أعمل ايه فى ضريبة ظالمه
شرعوها على الغلابة
خلو بيها الدنيا ضالمه
والحياة آخر كآبه

***
لسه بكره الله اعلم
حد ضامن يبقى أظلم
يعملولنا ضريبة تانية
لو ننام الليل ونحلم !!!