أحمد خيرى يكتب: مواطن بيحبك يا ريس

وربنا وحشتنا.. بنحبك بجد يا ريس.. من غير نفاق لأنك فعلا حبيبنا، ولأنك راجل وبطل، لكن بصراحة يا ريس عايز أقولك كلمتين فى ودنك، وعلى انفراد، وأنا عارف إن فى ناس هيقولوا عليا خباص وناس هيقولوا عليا فتان ونمام بس أنا ياريس ماليش مصلحة أنا بهدى النفوس مش أكتر.

بص يا ريس وأنت عيان وبتعمل العملية وكنت فى شدة بصراحة بقى الجماعة فى مصر شددوها علينا شويه وبزيادة كمان يا ريس ما صدقوا إنك غبت عنا، وبطلوا يروحوا الشغل يا ريس.. وكمان ما خدوش بالهم مننا.. يا ريس بص يا ريس الأنابيب زى ما هى يا ريس مولعة بص يا ريس كمان السولار كمان مش لقيينه وكمان فى استغلال، يا ريس وبتوع الميكروباص وسواقين النقل والناس مخنوقه بالجامد، يا ريس إيه ده نسيت أقولك وكمان من يوم ما مشيت وفى اعتصام للعمال قدام مجلس الشورى ولله ما أنا عارف أو مجلس الشعب المهم إن فى مشكلة للعمال ومشاكلهم زادت اليومين دول، يا ريس وبص يا ريس الضرب لسه شغال فى المدارس، مرة أستاذ يعجن تلميذ ومرة طالب يضرب أستاذ، وشوبير يا ريس شكله هيسيب الحياة واللعب، هدى مع المستشار آخر مرة سمعتهم ده بيقول الأستاذ مرتضى والتانى بيقول الكابتن شوبير كده حاف من غير شتيمه.

بص يا ريس فى دكتور بيقولوا ضربوه فى الفيوم وكمان بيقولوا ويلسنوا على حضرة وزير الصحة وعلاجه بالمجانى وكمان يا ريس بيقولوا اليهود أولاد الكلب دول محاصريين الأقصى ومش لاقيين حد يلمهم ولا يقول لهم عيب.. اسكت يا ريس مش الشيخ طنطاوى تعيش أنت كلنا زعلنا عليه كان راجل طيب الله يرحمه، تصدق يا ريس أن مطروح قامت فيها خناقة بين المسلمين والمسحيين مش فاهم إيه ده عدوى، وانتشرت بس بيقولوا الجماعة لموها وهديت، والعقارية زى ما هى يا ريس، وسمعت يا ريس إن فى شوشرة كده وتلسين فى نقابة إيه مش فاكر بس كلام وطق حنك ياريس عن الدستور.. والحديد والأسمنت يا ريس مرة يزيد عشرة ومرة ينقص تلاتة واللحمة ولعت والفراخ اتجننت والخضار اتهبل وبيقولوا الأخ حواس رجع لنا تمثال والسياحة تراجعت مش عارفين ليه ياريس زى مرتبات الموظفين ولا الأسعار اللى زادت مش عارف، وبصراحة يا ريس الوزرا كلهم مش عارفين يعملوا حاجة من غيرك مش عايزين يتحملوا المسئولية، ويخففوا عنك شوية يا ريس.

وحشتنا ياريس يارب ترجع لنا بالسلامه بندعيلك وبصراحه بنحسد طقم الدكاتره اللى كل مابنشوف الاخبار يقولك صحه الريس فى تحسن وقام سيادته بمداعبه الفريق الطبى بصراحه

بنشعر بالغيره منهم وحشتنا ياريس يارب ترجع بالسلامه وتداعبنا احنا كمان وتخفف عنا كام وزير من اللى ماخففوش علينا و عنك فى غيابك ياريس
انا مش خباص ولا فتان ياريس بهدى النفوس.
مواطن بيحبك ياريس