رامى الدياسطى يكتب: حقنا فين؟

كانو بيعلمونا زمان فى الدين إن كل (راعى مسئول عن رعيته) قدام ربه وقدام ضميره بس للأسف لما الواحد كبر وفهم لقى نفسه فى زمن الراعى بياكل فى الرعيه من غير رحمة ولا إحساس وأقلها فى المرض بقى معظم طبقات الشعب طبقات دنيا يعنى لا عندها ولا ليها زى ما بيقولو عايشين على باب الله والعملية مش حقد ولا حسد ربنا هو اللى لينا بس على الأقل أبسط حقوق الواحد أبسط حقوق الدولة عليه.

هدخل فى صلب الموضوع على طول العلاج على نفقة الدولة وقفوه علشان خلافات بين وزارة الصحة ومجلس الشعب والله أعلم الخلافات دى سببها فعلا اللى بيقولوه طيب لو ده صحيح الوزراء والناس اللى هم المفروض بيرعونا ده المفروض بيتعالجوا على نفقة الدولة وبره بمبالغ طائلة واحنا أبسط حقوقنا فين هو الموضوع مش اتوقف بس حجموه يعنى كل نائب فى المجلس ليه 50 ألف لدايرته علاج على نفقة الدولة تفتكرو ده كافى معظم بلدنا دلوقتى عندها فيرس سى وربنا يشفى الجميع واللى ليهم أمل فى علاجه الإبر اللى كانت بتتصرف لهم وقفوها علشان مشاكل ما بين وزارة الصحة ومجلس الشعب علشان الميزانية، والإبر دى أسبوعية وبمبلغ وقدره يعنى حتى الراتب بتاع الشخص ميجبهاش فى الشهر والكورس العلاجى بتاعها لو وقفو ابره ممكن تبوظ كل حاجة قبلها أنا مش طبيب بس أنا حانق من الموضوع ده هم يتعالجو بره واحنا اللى بقين على بلدنا وبرده بنحاول نخدمها ده اللى بناخده منها فى النهاية عايزين حقنا بقى هنفضل لإمتى ساكتين وسايبين حقنا فى بلدنا كدة يا عالم حرام عليكم وكل اللى أقدر أقوله حسبى ربى ونعم الوكيل فيكم يلى ربنا إداكم السلطة ومستخدمتهاش لصالح إلى المسئولين منكم (الشعب).