د.طارق النجومى يكتب:الكوتة وما أدراك ما الكوتة ؟!!

أمسكت بأحد الجرائد قرأت عنوانا.. الكوته خيارنا.. وأفتح التلفاز فأجد ندوات تتحدث عن الكوتة فسألت حد يفهمنا يعنى إيه الكوتة.. الله يستركم ويبعد عنكم الجهل والجهلاء فقال أحد الجالسين الكلمة دى شكلها كلمة أبيحه وعيب!!! وآخر قال إنه سمع أغنيه تقول الهوتا كوتة والحال ألسطه!!!.. وإذا بضحكة خشنة مجلجلة تنطلق من خلفنا.. عايزين تعرفوا يعنى إيه الكوتة.. قلنا له أيوه.. الله يستر عرضك.. فرشف آخر رشفة من كوب الحلبسة بصوت عال مع مصمصة شفتيه وقال شوف ياهندزه منك له.. الكوتة دى والله العليم.. معناها كل واحد ياخدله حتة.. يعنى يهبر له هبرة.. الواد صميدة صبى المعلم صبحى الجزار قال إن برعى قاله كده امبارح فى السلخانة !!!

قلت كلام جميل كلام معقول ماقدرش أقول حاجة عنه.. وباين كلام الراجل ده نقلا عن صميدة و برعى كلام مظبوط وميه ميه !!!.. طيب وأنت مغلب نفسك ليه ؟؟؟
فتحت النت ودخلت كلمة كوتة.. قالى تقصد كلمة Quota.. قلت يمكن ؟؟؟.. طلعت إن الكلمة كلمة لاتينية ومعناها حصة من مجموع (حسب النسبة) قلت فى بالى والله الواد برعى ده واد مثقف وجاب التايهه هى صحيح معناها هبره وكل واحد طبعا يهبر على قده.. ده قانون الهبر المعروف بين الهبيره !!!

قلت فى نفسى طيب ليه مابيقلوش حصة أو نسبة !!! يعنى الكلمتين دول كلمتين وحشين.. وافتكرت كلمة الدعم اللوجستى اللى خرموا ودانا بيها ؟؟؟ و فى يوم عرفت أن التطور المجتمعى اشتغل لما شفت خناقة فى حارة بين شوية شبيحة.. وفجأه.. جعر واحد منهم بأعلى صوته بسرعة ياحكشه.. روح للأسطى شبطه.. يبعتلنا دعم لوجستى.. أحسن شكلنا هنتاكل فى العركه ديه !!!

قال واحد.. طيب لو كل شوية بقى لهم كوتة وفتحنا على نفسنا الفتوحة الغبرة دى.. هيبتدوا بالمرأه لأنها مهضومة الحقوق وضعيفة ومكسورة الجناح.. يعنى عايزينها تنزل الانتخابات تتبهدل وتشرب تراب.. وتقف فى الشمس وبشرتها الحساسة تلتهب !!!.. وتسلم على اللى يسوى واللى مايسواش.. ده كلام ياناس !!!.. الحيا والخشا جرى فيهم إيه !!! مايصحش لازم المرأه تقعد معززة مكرمة فى بيتها ويجيلها المقعد النيابى لغاية باب البيت ويبعتوا اتنين يشيلوها بيه ويوصلوها لغاية المجلس الموقر!!!

رد واحد مسحوب من لسانه ضعيفة و مكسو رة جناح أيه.. لما يكون لها حق.. لسانها يبقى العرض عرضين و تلاقيها زى الوحش الكاسر.. وتختفى كل علامات الأنوثه.. و تجعر بأعلى صوت يعنى أيه ست.. الست زى الراجل.. مافيش حد أحسن من حد.. ياعالم يارجعيه يا متخلفين !!! ولما تحب تريح نفسها أزاى أقف فى المترو والراجل قاعد.. أيه قلة الذوق دى.. ماتقفشى فى طابور البنك مع الرجاله علشان تمشى بسرعه.. وهلم جره.. تبقى ساعتها.. أنا واحده ست !!!.. أناعندى برد !!!

رد واحد من الشله كوتة مرأة إيه وبتاع إيه.. أمال إحنا الأقباط نعمل إيه.. حقوقنا مهضومة و بيميزونا عنكوا فى البطاقة فى خانة الديانة ونقول المواطنة اللى مافيهاش تفرقة بين مسلم ومسيحى مافيش فايدة و بنتحارب و بيقتلوا فينا فى كل حتة.. احنا اللى لازم يكون لنا كوتة !!!

بقى دى آخرتها ياجرجس مانت معانا فى الشلة من سنيين، واكلين شاربين سهرانين مع بعض فين التفرقة !!! وماشاء الله محلك فى وكالة البلح يرمح فيه الخيل.. والمحل مليان بصور المسيح والصليب بالحجم الطبيعى.. ومعظم زباينك مسلمين.. وعيشتك معدن وأنت أغنى واحد فى الشلة.. وبنروح أنا وأنت للأسطى هانى الكهربائى والأسطى ميخائيل الميكانيكى وللدكتور حنا.. وبنوكل الأستاذ شكرى المحامى والقضية اللى فاتت كانت قدام المستشار صبحى صليب !!!

إيه الكلام ده ؟؟؟ يعنى هى خانة الديانة فى البطاقة هى اللى هتميزك وتعمل تفرقة ؟؟؟.. أمال أنت مميز نفسك ليه.. وداقق الصليب على إيدك !!!.. بتقول للى مايعرفش إنك مسيحى أعرف !!!.. لو أنت صحيح أنت وغيرك خايفيين وبتدبحوا ماكنتش عملت كده .!!! .. وماكنتش سميت ولادك أندرو وكرستين وتريزه !!!

طيب ولما أنت مش عايز تفرقة.. طيب بتطالب ليه بكوتة.. ولا أنت عايز مايكونش فيه تفرقة عن طريق التفرقة !!! إيه الفزورة ديه ؟؟؟

سرح بى الخيال وقلت لنفسى والله اللى فهم الموضوع صح الواد صميدة.. لما قال إن معنى الكوتة.. هبره.. طيب ما كل مين حاسس إن حقه مهضوم يبقى له هبرة من الدبيحة.. !!!

و لقيت نفسى بتقولى وأنت فين نصيبك من دى.. ندهت للعيال وقولتلهم بسرعه يالا نلحق نصيبنا ياولاد واستغربت لما لقيت كل رجالة وستات وعيال المنطقه بتجرى معانا.. وصلنا لاقينا الدبييحة عبارة عن هيكل عظمى مفيهوش ولافتفوتة لحمة !!! ومع كده كله هجم وهات يانحت فى العظام وكل واحد يخطف اللى تطوله إيديه ويجرى وعندما شددت عظمه من يد واحد منهم قام متمتطع وضاربنى بيها على نافوخى!!!

صحوت من النوم وأنا أتحسس رأسى.. وعيناى جاحظتان من الفزع.. قلت لنفسى الحمد لله.. كفى المؤمنين شر القتال.. وماهى لحظه إلا وابنى الصغير يهزنى ويشد ملابسى.. بابا.. بابا.. ماينفعشى المصروف اللى بتضحك عليا بيه كل يوم.. أنا عايز أوته من مرتبك.. !!!!!!.