أحمد صلاح محمود يكتب: مبروك كسبت خمس دقايق نسيان

مبروك كسبت معانا
خمس دقايق نسيان
ترتاح فيهم حبه
من روح وتعالى
وم المصاريف والاهات
وم الذل والطلبات
خمس دقايق نسيان
ترتاح فيهم شويه
وتشرب شاى كمان
وممكن لو عايز
وأكيد عايز
تنسى البيت والعيال
والمشاكل
واللى تكلم
واللى قال
ما أنت كل يوم ف نفس الموال
نفسك ترتاح م الجد حبه
وتروح فى نوبة هزار
وأهى جت الفرصة لحد عندك
خمس دقايق نسيان
من غير وجع دماغ ونشرات أخبار
هو أنت جبل
ده لو جبل كان أنهار
من كام سنة وأنت عايم عكس التيار
من كام سنة وأنت بتصحى
على لوم ونقار
من كام سنة
وأنت عايش فى ليل مستنى نهار
وأهو جه النهار
صحيح خمس دقايق
بس أحسن من مفيش
افرح وأضحك بقى
حاول بسرعة تعيش
جايز بعدهم متلاقيش