فيسبوك
واتساب
صورة بألوانها الباهتة
بتنسِينى ليوم العيد
أسرح فى الأشكال حواليّا
وبألوانها تنادى عليّا
بتورِّينى سر جديد
وتورِّينى فـ معنى وتانى
وتعدِّيلى ساعات وثوانى
وتأكدلى فـ تالت معنى
إن الصورة واضحة أكيد
علشان هى صورة بسيطة
واللى رسَمها صَوَّر حيطة
بس غريبة شوية عليّا
كل ضلوعها حديد فـ حديد
والحيطة مرسومة لتحت
مش باينة من جوة الفَحت
والباين بلدوزر شايل
لحديدة يغرسها بعيد
والحيطة بتِقسِم فـ الأرض
بتقَطَّع من عَرض وفَرض
وتباعد بين الأحباب
بتجوَّع وتحاصر بيت
الصورة بِتِألِم وبتنزِف
وبتاخُد من دمِّى وتِغرِف
واتارينى فـ الجنب الآسى
بَتساءِل .. والعقل شريد
ليه الإيد الحاكمة بِترسِم
بفواصل ومَعابِر تِقسِم
بين القلب الواحد تِدمِي
والفايدة مش عايدة أكيد
ليه الحاكم ينسَى الأصل
إن الأصل ياناس الوَصل
وبيرفع للعار .. فـ جدار
صورة باهتة بالتأكيد
والصورة مش صورة شعب
دا الشعب عايش ع الصعب
سِجن وحُزن وهَم كمان
بالصورة مش يعنى سعيد
