أشرف المتولى محمد يكتب..بعد الماتش قادها حريقة

بوتفليقة خد تعسيلة ونسى مين حرر له الـــدار
حط فى ودنه قطنة كبيرة وراح مولع فيها شـرار
بعد الماتش قادها حريقة حتة جون خلاه ينهــار
سنجة ومطوة فى ملعب كورة قالوا نولع فيها نـار
نسيوا إن الكورة رياضة ولا ساحة للفــــرار
اكسب وافرح دا من حقك لكن عيب تقول كفــار
وأبو روراوة معصب نفسه واكل شطة من العطار
تقولش قاد الجيش المصرى يكونش هازم التتـار
دا إحنا خير جنود الأرض مين يتساوى بالأخيـار
علم وفن وفكر غزير ومدنة تسمع للأعمـــار
مصر دايماً رافعة الراية ما تستسلم ليل ونهــار
ولا مليون ماتش يخلى أرض العزة لا تحتــار
الرياضة فوز وهزيمة لا تعصب لا دمـــــار
السودان مش أرض محايدة كله يوحد للقهــار
تكسب أكسب لا نتعصب ما فى بينا أبدا طـــار
الجمهور رايح يتمتع قاعد آمن عند الجــــار
لكن أسفى على المسلم دم أخوه بيسيل أنهــار
وفد مصر حاجة تشرف مش شوية طوب وأحجار
شايل حلم بلاده فى قلبه راضى بقدرة الغفـــار
وأبو تفليقة قاعد ساكت ياعم شوفلك حلقـة زار
إنت فاكر نفسك تقدر توصل مرة للطيـــــار
يا عم فرنسى أتكلم عربى إن الله حليم ستـــار
فى السودان جند صيع خلوا الجو كله غبـــار
تركوا مبادئ العروبة تركوا عزة الديـــــار
الإسلام فى قلوبهم صورة دمروها لا ازدهــار
نسيوا إخوة العروبة مين هياخد القـــــرار
هنيئا ليكم كاس العالم هنيئا لينا الإصـــــرار
وهات لى ودنك يا عزيزى حط الإبرة فــى الزرار
هأقولك كلمة حق فى ودنك علشان تبقى من الشطار
مصر تاريخها نبع عظيم مصر ذكرها الجبـــار
مصر أصالة مصر حضارة أرض سلام ليل ونهـار
مصر مدت إيد العون لكل الجيرة صغار وكبـــار
دم ولادنا فى كل مكان شاهد حر على الأبـــرار
يمنى جزايرى كويتى وسورى وإلا نسيتم التتــار
وفى حطين كنا أسود بين إيدينا السد انهــــار
اللى ينكر فضل المصرى قول عليه إنسان غــدار
كاس العالم ليس الجنة ولا حرمانا منه نـــــار
أرض النيل دايماً حرة أرض الخير يا مصر عمــار
أرض الفتح أرض الأزهر أرض عبور لجيش جرار
ولا مليون أزمة تهز فى عزة بلدى أدنى جـــدار
كل تاريخ الدنيا يهون إلا تاريخ بلدى منـــــار
عظيمة يا مصر عظيمة يا بلدى ألف حسرة عالديـار
ألف حسرة عالعروبة كاتمة الصوت ضد التيــار