عبد الرحمن تمام يكتب: كومبارس !!

الشوت الأول فـ الفيلم..
4\3\ 2008.
برفان سماوى بريحة الحلم..
حضن - صدفة - خريفك ثانية.
كان يوم حد
يوميها بس البرد
فارق ضلوع السكة
توبك اللى اشتكى م العتة
الشمس قلعت نقابها
لضمت خيوط سحابها
وقعدت ترقع فيه !
سفيه !!
مكانش لازم شعاعها
صفصافه يخدعك.
رسملك ضل وضل وضل
وفاتك وحدك..
تعابين الضلمة تلدعك.
الملح يسرق م الحيطان !
والبرد ينهش فـ البيبان !
عارفك زعلان !
اكمن ( السينارست )
خلاها ( كومبارس )
يظهر بس فـ لقطتين .
كلامها يبقى صمت..
صدى همس..
يفرّح فـ ضلوعك دمعتين.
مشهد والتانى تفوتك
تسرق من خريفك فرحتين.
بلاش حنينك يقول ( كلاكيت )
كرباجه علم فـ كلامك.
آمن بقى بغروبها
الليل ف المشهد قدامك.
راجع حوارك معاه..
اقرأ من تانى ( السيناريو )
بلاش تخرج ع النص .
تعبت بجد ( المونتاج )
أسبوع بحاله..
مشاهدك فيه تتقص.
مثل !!
طول عمرك بارع فـ التمثيل.
اقنع دى الكاميرا إنك فوقت
ومراية عنيك دلوقت
قادرة تشم ملامح الليل.
ومتخافش !!
رغم إنها كانت كومبارس
حقها محفوظ فـ التتر.
بالبنط العريض اسمها..
وموسيقى تصويرية.
لـ ( ياسر عبد الرحمن )
وصورة متر فـ متر
وكسوف عنيها أفيش !!