د. مدحت أنور نافع يكتب:أمانة عليك قبل ماتقول حرام

أمانة عليك قبل ماتقول حرام
وتحجر علينا بدون احترام
وتلعن أبوخاش رسول الغرام
ماتنساش تراعى الأدب والأصول

ماتنساش تبارك لجارك سعيد
وأحمد وجرجس ومختار وعيد
فى عيد الجلاء أو بدون أى عيد
كفاية تشع ابتسامتك قبول

ماتنساش توسّع لعمّك نجيب
تقوم لجل تقعد ثريا وحبيب
وتعمل حساب للقريب والغريب
وتحفظ نظام الطابور لو يطول

ماتنساش تخلّى كلامك لطيف
وتخلص فى شغلك وجيبك عفيف
وتقسم مع ولد عمك رغيف
ولو كان مغمس فلافل وفول

أمانة تراعى حقوق الجوار
ومايكونش صوتك زعيق فى الحوار
ولو شفت يوم حد ساحب حمار
ونازل غلط فكره بالرسول

أمانة عليك تنتصر للبرئ
وتنقذ غريمك ولا يموت غريق
وتصبح مثال الجدع فى الطريق
ولانشفش منك سفه أو فضول