علياء ناصف تكتب:مع الاعتذار لعمو بتاع الدبابيب

عيد الحب الجميل.. إللى تعالوا بينا نتكلم بصراحة عنه.. وما نخليش فى نفسنا حاجة إلا ونقولها! عيد الحب من الآخر كده المستفيد الأول والأخير منه هو عمو بتاع الدباديب وعمو بتاع الورد وكمان شركات الموبايل.

أما المعنى الحقيقى فحدث ولا حرج! قولوا لى بصراحة مش الأحسن إن اليوم ده يبقى يوم الحب آه ما قلناش لأ بس الحب لمين؟! ناس حلوة بجد من جوه.. مش الجماعة إللى حاطين ماسكات وأقنعة.

قولولى صحيح هو الحب فعلا مش ساعات بيبقى لابس نظارة شمس سوده والسواد اللى على تقيل كمان يعنى مش فوتو جريه ولا فوتو براون لاااااا! والظاهر كمان ان عقولنا بتبقى حطة ستارة سوده من النوع التقيل برضه علشان كده ممكن نلاقى الناس إللى عايشة فى عالم أوهام أوهام ومقضينها حب لناس ما تستاهلش أى نقطة حب.

على فكرة دى مش نفسنة ولا حاجة صدقونى لا على محلات الورد ولا على عمو بتاع الدباديب ولا على شركات الموبايل ولا على حتى الناس إللى بيجيلها الهدايا والماسدجات لاااااا دول أكتر ناس بيصعبوا عليه.

طبعا أنا ما بتكلمش على المتجوزين لأنهم طبعا ما لهومش علاقة بالموضوع ده لا من قريب ولا من بعيد!!!!!! أنا بتكلم على إخواتنا وإخوانا إللى فاكرين إنهم عايشين الحب قصدى الدور.

ويا سلام لما يشغلوا الاغنيات إياها إللى طبعا لازم ولابد تكون لزوم العيد السعيد.. ده أنا كمان دخلت على أحد المواقع لقيت فيها عشرات الرسائل إللى برضه لزوم عيد الحب للأسف بتلعب على أوتار مش لطيفة أبدا هو ده بقه يا إخوانا عيد الحب!!!!!! أرجو اعادة النظر.

ما تيجى نعمل حملة كده من ناس جدعان زيكم ونغير المفهوم إللى حاصل فى عيد الحب.. أيوه إيه المشكلة أنه يكون فيه دباديب وكمان ورود حمرا وصفرا ولا تزعلوا بس مش للى بالى بالكم.

إنما تكون للأطفال المرضى فى معاهد الأورام ومستشفى 57357 ومش بس الاطفال كمان الناس اللى فى دور الرعاية الخاصة، وهما دول إللى يستحقوا فعلا أن احنا نفرحهم وخلى محلات الورد والدباديب تهيص وكله يتبسط بس ده كله يروح لناس تستاهل......... مش كده ولا إيه؟

صدقونى يااااااااا جماعة وخدوها نصيحة من اختكم الصغيرة أو الكبيرة مفيش مشاكل الحب الحقيقى لازم يكون لناس تستاهل وحطوا تحت تستاهل دى عشر خطوط والناس إللى تستاهل دى بنعرفها من المواقف ومن العشرة مش من العلاقات الطيارى ومن التيك أواى.

لأن الحب عمره ما كان ساندوتش! وارجوكم حطوا ضمة على الدال علشان المعنى يوصل!!! مستنية رأيكم فى إللى أنا بقوله.. ووردة ودبدوب ليكم كلكم.. وكل سنة وانتوا دايما بتحبوا ناس تستاهل حبكم مش الناس اللى بالى بالكم.