محمد علاء الدين تكتب :(آلة زمن )

بقى معقول
لسه الطفل
جواك زعلان
بقى معقول
لسه ملامحك خايفه تبان
جوه الصورة
ومراكب الشمس
اللي كنت بتلعب فيها
فـ عز الليل
تاهت جوه بحور الخوف
ضلت سكة مابين شطين
بقى معقول
ينساك الليل
جوه مغاره
بقى معقول
آلة الزمن
بقت خربانه
وهترجع تانى
إنسان حجرى
عايش فـ الطين
بقى معقول ينساك الليل
ولا أنت
حابب ترسم نور الشمس حبال
حابب تمشى عليها فـ سيرك الليل
حابب كل قطور الموت
تدهس حلمك كل يومين
آه يا جبان
بص فـ وش الليل واصرخ
أمسك إيد الشمس وعدى
طريق الموت
أشرب كل دموع السكة
يمكن بذر القلب ينبت
فجر جديد
ولا أنت
حابب تمشى فـ ضل الليل
بقى معقول
ينساك الليل

( جوه الجون )
جوه الجون
كوره غريبة بألفين لون
فطة نطة جوه الشبكة
طرحت ضحكه فـ قلب الكون
جوه الجون
سنتر كل حياتك تانى
أكتب فوق الدايره أغانى
ألعب جوه ملاعب بكره
يمكن تطرح ميت مليون
جوه الجون
أضحك حبه
عيط حبه
أكتب اسم بلدنا الحلوة
بنور الشمس
أقفل كل بيبان الأمس
فـ وش الليل
أضحك لما الأرض تضمك
أركب مره بساطك طير
بره السور
جوه الجون
أسحب كل مراسى الخوف
دخل شمسك بحر الكون
جوه الجون