السيد عادل يكتب.. ملايين الكورة جننت الناس

كنت قاعد أنا ومراتى بنتكلم على أحداث الكورة والفوز العظيم اللى حققه المنتخب الوطنى بعد الفوز على غانا، مراتى بتدعى لابننا الوحيد وبتقول يارب يا محمود يابنى يوفقك فى تعليمك يا رب ، تلقائيا انا قولت لها" بعد الشر " خليه يلعب فى الشوارع علشان يكون لعيب احسن وقعدنا نضحك على الكلام ده.

فكرت شويا وقولت فى نفسى انا قولت كدا ليه ، وكانت الإجابة طبعا هى ما فعله الإعلام من تغطية كبيرة صرفت نظر الناس وتفكيرهم عن مشكلة لقمة العيش وخلتهم يتابعوا الكورة ، لما الإعلام يستضيف أهل اللاعب الفولانى وتلقيه راجل فى منتهى البساطة زى أهالينا وابنه اللاعب بقى مليونير وهوه معاه دبلوم صنايع بالعافية ، لما تلاقى نفسك مهندس متغرب ومتبهدل فى دول الخليج والكفيل مطلع عينك وده لأن غلطيتى أنى اهتميت بدراستى وتفوقت ، لما تلاقى أن رئيس بلدك يبعت ولاده الاتنين علشان يتصورو وهمه عرقانين وبيهتفوا مع المشجعين ( دعاية للرئيس الوريث طبعا )،

لما تلاقى ان زويل وهوة فى سن اللاعيبة دول كان غلبان ، لما تلاقى أن الدولة بتكرمهم بالملايين وأنا موظف فى مجلس مدينة ميت غمر مهندس فى التنظيم باخد 170 جنيه (آخر مرتب اخدته من 5 سنين معرفش بقى كم دلوقتى ) يا اما تسرق يا اما تشحت . بعد ده كله ما اتمناش ان ابنى يلعب كورة احسن له ولينا .

البلد دى مش هتقوم على أكتاف لعيبة الكورة والمغنيين والممثلين والرقاصين اللى الدولة بتكرمهم بملايين الجنيهات كل يوم ، البلد محتاجة الدكتور والمهندس والمدرس اللى بيتشعبطوا فى الاوتوبيسات علشان يروحو شغلهم كل يوم الصبح.