أسامة غانم يكتب..حوار الناصح.. والعبيط

صاحبى الناصح دائما بيتكلم معايا فى كل الأمور والمشاكل اللى عايشنها ودايما لما يسمع رأيى يقولى ياد أنت عبيط..
شوفوا معايا حواراتنا وحكاوينا واحكموا انتو
قالى: هتقول إيه فى الانتخابات يا عم؟
قلت: انتخابات إيه؟
قال: انتخابات الرياسة وترشيح دكتور البرادعى من بعض السياسيين والمثقفين والأحزاب، وده يا عم مدير الطاقة الذرية.
قلت: مدير الهيئة الدولية للطاقة النووية يا عم.
قال: ذرية.. نووية المهم عايزينه يرشح نفسه وأنا موافق عليه زيهم علشان ده دكتور وعالم، وكان قاعد بره كتير وعارف رؤساء وناس فى مناصب حساسة فى العالم يقدر ينعنش مصر كتير وأمريكا بتحبه وشوف بقى الدولارات يا عم.
قلت: هو بس علشان كده عايزه يرشح نفسه.. يا عم ده كان بيزور مصر على فترات بعيدة، ودايماً عايش بره هيعرف إزاى حال البلد إلا من الجرايد والتليفزيونات الأجنبية ولا يعرف شكل المشاكل الحقيقية فى مصر وكمان إحنا اتغيرنا كتير عما شفنا زمان.. ده لازم يعيش معانا ويعيش مشاكلنا ويعرف يحلها.
قالى: يا عم الناس بتوع الأحزاب هيزبطوه زى ما بيزبطونا ودى سبوبة انتخابات نستنفع منها متبقاش عبيط.
قلت: أنت عارف إنى مليش فى السكة دى وجالك منين أن الدكتور البرادعى رشح نفسه أو اتكلم أصلاً فى الموضوع ده وأنت عارف فرقة التهليل انتهزوا فرصة خروجه من منصبه، وحطوه على الساحة وأنت عارف يا ناصح فبركة الأحاديث فى الجرايد والتليفزيون بتاعة السبوبيون زيك ده خلوه يشرط علينا ويقول تغيروا الدستور و تكون انتخابات نزيهة.. طبعاً عامل مش واخد بالك عشان مصلحتك.
قال لى: بطل عبط هو ده الكلام الصح.
قلت: تعرف أنا نفسى جمال مبارك يرشح نفسه.
قال لى: يعنى (توريث)؟
قلت: أنا بكره الكلمة دى ومعرفش أحطها فى جملة.. هو يا بنى بوش كان توريث.. ولا كاسترو كان توريث وبلاش أقولك بشار الأسد.. إحنا يا مصريين من قديم الأزل ابن الصياد صياد، وابن الدكتور دكتور.. والترزى ترزى ما بالك وده ابن الريس وشغال كويس فى الحزب، وعايش فى البلد وعايش المشاكل كلها.. الحاجة الجامدة أنه فى المطبخ السياسى وقريب من كل الأسرار وأنا وناس كتير من شعبنا حاسين بيه وحاسين أنه ابن بلد ولو رشح نفسه أنا أول واحد انتخبه مع إنى منتخبتش حد قبل كده وأنا عايزك تبص للموضوع بعيد عن مصلحتك، إيه رأيكم معايا؟.. ولا مع صحبى الناصح؟