مريم عبد العزيز عبد اللطيف تكتب:نهج بيرم

يا مصرى دا أنت إللى هاممنى من دون الكل
غلبان ويحسبك الجاهل عايش ميت فل
تقضى ف الطوابير عمرك والدنيا تمر
محبوس يا عينى ف زنزانة و قالولك حر
وتلف ف الساقية يوماتى وتدوق المر
ومصر قربة مخرومة وعمّالة تخر
والخير بيتدلدق منها والخير مش ليك
وإمتى بس هتتحرك وتفوق معاليك

يا مصرى دا انت إللى هاممنى من دون الناس
صابر ويحسبك الجاهل معدوم إحساس
بلدك باعوها ولمزادها دقوا الأجراس
وبدال بلدنا هيدونا فضة ونحاس
وكأن مصر بقت جارية و هم النخاس
والكل ماسك سكينة ونازل تقطيع
وانت واقف تتفرج وبلدنا تضيع
آخرتها ألقاك ف العتبة ف حقك بتبيع
وابقى سلملى ساعتها على دا تطبيع