شعاع وسط الضباب
أمل فينا اتخلق
نقدر.. أيوة بنقدر
مش حلم من ورق
لحظة قُدرة ومشيئة
دبِت جوة العروق
صوت الصفارة زغرد
أهوه.. ممكن نفوق
محينا سطر واحد
فى مجلد م الألم
وعرفنا إزاى سجودنا
يبقى تحية علم
صبحت ملامحنا فرحة
بعد اليأس إللى ساد
عجز وقهر بيهرب
فرعون فى عيونَّا عاد
نرقص نملا الشوارع
ننفَّض فى الهموم
فجأة بحبك يا بلدى
تظهر فوق الوشوش
وبتبهت ع الهدوم
مين إللى م الزمالك
ومين م العشوائية
مين مسلم مين مسيحى
الكل شكل واحد
الكل سن واحد
مواليد اللحظة ديه
فادى عمال يكَلكِس
يهتف ويَّاه جمال
أطفال على كتف سيد
اللي معندوش عيال
حتى بتاع الجرايد
الكُهنة أبو عطية
بطولتهم فاردة ضهره
راحته باينة ف عينيّه
صوت نوح فى الراديو يعلى
مدد مدد يا بلدى
مدد مدد يا نصر
تفلت دموعى غنوة
تقول مبروك حبيبتى
ألف مبروك يا مصر
