أجمل نجوم السما
نزل ف إيدى اليمين
حسيت براءته ف كفى
ونوره على وشى
غمّضت عينى.. انما
روِض خيالى الشوف
أوضه ضلمة
بهدوء شديد..
فتَحِتْ الباب الخشب.. واتسحبِتْ
الأوضه كانت ضلمه كحل
وانا كنت أغمق ركن ف الضلمة
رغم المهدئ.. بارتعش تفكير
الأوضه كانت ضلمه كحل
أشباح كتير م الماضى نهشتْ عزلتى
فطفيت سيجارة ف كفى
وقلبت السرير
الأوضه كانت ضلمه كحل
أوقات كتيرة شجاعتى بتخونى..
مش قادر اقطع حتى شريانى الأخير
بهدوء شديد..
فتحتْ الباب الخشب.. واتسحّبتْ
ما بقيتش عارف.. هاعمل إيه؟؟
صـياد فـراش
ماكانتش حاجة تخوّفه
غير بس لما الشمس
تبهت ف الغروب
كان وشه متعفر.. ذنوب
وجوارحه كانت كلها
متلهفه تشهد عليه
لكنه.. كان عنده أمل
ما اعرفش ليه
إنه ف حياته الجايه
يتحول فراشة مرفرفة
تباركها تسابيح الشموع
طول عمره كان
صياد فراش
كانت صور فراشات كتير
متعلقة
على كل جدران ذكرياته
بشكل ملفت للنظر
كان لما ييجى الليل
يبكى ويعتذر
وتعض أدفا مشاعره
أنياب الندم
لكن دموعه بتنهزم
لما بيلهث بالنهار
ورا صيد جديد..!!!
إنسـان فـقـير
سمعتْ أنواع الموسيقى كلها
وسافرتْ على كل الخطوط
حاسس بإيه ؟؟
حاسس بإنك
_ رغم فضل الله عليك_
قلبك فقير
حاسس بإنك مستباح
من كل أجناس دنيتك
صمتك ماعادش مستحب
والكلام عاصى عليك
وشنقت نفسك
بإنفعالات التمنع والتصنع
والخضوع
اسمح لى تانى أسألك
حاسس بإيه
................
مالكش حق
