سمر رزق تكتب: لا تكنْ إمعَّةَ

ابدأ خير البداية بحديث الرسول، صلى الله عليه وسلم: "لا تكونوا إمَّعَة تقولون: إن أحسن الناس أحسنّا، وإن ظلموا ظلمنا، ولكن وطِّنوا أنفسكم: إن أحسن الناس أن تحسنوا، وإن أساءوا فلا تظلموا". لا تتقمص شخصية غيرك ومتحاولش تقلد أى حد، وعلى رأى اللى بيقول: متحاولش تبقى حد إلا نفسك.

أنا بستغرب جداً لما أقابل حد هو ومش هو.. عارفين يعنى إيه؟ يعنى مثلاً لو قابلت النهارده فلانة اسمها وليكن (عواطف).. متضحكش ده أنا بقول مثلاً.. تيجى تانى يوم تقابلها تلاقيها (نانسى)!

إيه يا بنتى اللى عاملاه ده؟!.. تلاقى اللى ترد عليك وتقولك أصل مش عارفة مين كانت كده امبارح فى المسلسل، ومش عارفة مين كانت عاملة إيه فى اللى معرفش إيه فى الفيلم مش عارف إيه، وهتقعد تحكيلك قصة حياتها! طيب وليه تبقى حد تانى غير نفسك؟!

ربنا، سبحانه وتعالى، خلقك ولم يسبق لك مثيل، ولن يأتى مثلك فى الدنيا شبيه لأنك ببساطة شىء آخر. خليك إنت مختلف عن أى حد، متحاولش إنك تقلد فلان وعلان.. لسبب واحد إنك (مختلف).
خليك على طبيعتك، هو فى أحسن من كده.. إنك تبقى زى ما ربنا، سبحانه وتعالى، خلقك.

عش كما خُلقت، متغيرش فى صوتك، ولا نبرتك، ولا تخالف مشيتك علشان ده ولا ده ولا ده.. خليك على طبيعتك، ولكن لا تلغِ وجودك وتقتل استقلالك.