أحمد عبد الله محمد عبد الله يكتب: عايش فى دور شارع

الخميس، 23 ديسمبر 2010 12:48 ص

اضف تعليقاً واقرأ تعليقات القراء

ابتسامتك
المرسومة على ألف وش
بدأت تتحلل
لما سنين عمرك
بدأت
من خرم جيبك
تقع
سنة
ورا سنة
ورا سنة
فى الشارع
اللى باقيلك عشرين سنة
عايش دوره
شايل خطاوى الناس فوق كتفك
وعلى الراس
ألفين مداس
……
الحوارى
المتقاطعة على جلدك
مبقتش عارف عددها
غير أنها بدأت تزاحم الشرايين
هنا
اكتشفت أنك محتاج لإشارة مرور
علشان حوادث ذكرياتك مع الواقع
والحلم
اللى كل يوم يموت منه
ألف عيل
………
الشارع
اللى قاسم قلبك نصين
وعلى كل جنب ناس واقفة
بدأ يتظاهر ضدك
لما حاولت تنضف كل حوارى قلبك
من أى نفاق
وقرر
ف لحظة
القيام بانقلاب عسكرى
وطرد خيالك
من كل حواديت الضل