فيسبوك
واتساب
بوصل سلامى
ووجه كلامى
لكل اللى طالع
عينه ف بلدنا
.................
هقوله أنت بس
روق شوية
وبطل تحس
وعدى الأزية
مسيرها هتفرج
ف وشوش ولدنا
وفوت، ونفض
وطنش، وعيش
ولو كان فى حاجة
مضيقه سعادتك
ويوم حد سألك
احلف مفيش
وعاوز تفضفض
تقول اللى كابتك
وتشكى لحالك؟
-شوية جنان!
وقدام مرايتك
وقول ما بدالك
واحكيلها عاللى
صابنا ونابنا
واحكيلها عاللى
مسمم بدنا
..................
وبالحق قولى
أخبار عيالك
نسيتهم ف زحمة
شغل وطاحونة
ولا ف أزمة
عيش من الطابونة
ولا ف أسعار
ونار الطعام
ولا ف دين
ولا قسط وسخام
ولا يا سيدنا
لسه ف بالك
خاللى انت بالك
وربى كويس
لحسن يضيعوا
وتندم يا ريس
وتفهم وتعرف
إن مفيش
فايدة لشقاك
غير ف فرحة عيالك
وأخبار مدامك
أقصد مراتك
لسه بتهوى
تسود ف عيشتك
وعايشة وماشية
بكلمة حماتك
اللى لسانها
بيلعن ف سيرتك
ولسه برودك
غيظها وسكاتك
ولا مسيطر
وحاكم عاشيرتك
..................
الله ف عونك
بتتعب وتشقى
ووسط ده كله
بتقدر وتلقى
عقلك ف راسك
ولسه انت عارف
اسمك وسنك
ولسه مسامح
أبوك اللى جابك
عليك مش هطول
بس انت أول
ما تقدر تنفذ
اللى بقوله
أمانة تقولى
ازاى هتقدر
يومك بطوله
تفوت، تنفض
تطنش، تعيش
لحسن ده طالع
عين اللى جابنى
ومش عارف اسكت
وفايدة مفيش
