حسن العربى يكتب: يا قراء اليـــــوم الســابـــع

يا قراء اليـــــوم الســابـــع عَـندكو مانـع ؟
تِدُّو نصيحة لواحد ضايـــع زَييِّ و تابـــع
باقرا جرايد .. أخُش مواقع غيم و زوابـع
غير فضائيات سِرَّها باتــع و ياريت نافع
ببساطة أنا رجل الشـــارع
يا قراء اليـــــوم الســابــع

إنتخابـاتـنـا على الأبـــــــواب يالــَّلا شبـاب
إشى عُمال و فئات و هبـــاب و دى أحزاب
و ده كان شايف نفسه و تاب و ده كــــدَّاب
بعد ما ينجح فَـــــــص و داب فى النــــواب
تحت القُبة كأنه متابــــــــــــع
وبيتحصَّن و مالـــوش رادع

إيه يا بلدنا لإمتى سكوتـــــــــــى جوُّه تابـــوتـــى ؟
مش راح يِفْرِق موت على موتى و مش حاتموتى
حادلى بآخر نبرة ف صوتــــــــى بدال ما تفوتــــى
تستجدى من العالم قوتــــــــــــى بِرَهْن بيوتــــــى
و نكون دولة ف عـالم رابــــــــع
عِزبة ف كون الله الواســـــــــــع

لَمَّا آمـنـت بقــيــــــمـة دورى قلت ضـــــــرورى
أنزل اشارك وارضى غرورى مش امسح زورى
بوجبة و مبلغ نقدى و فـورى ورغم شعــــــورى
إن غيابى زى حضـــــــــورى ووِدا شيئ صورى
باردو مانيش حايأس و أقاطع
واندم و ابكى اللبن القاطــــــع

و بديت أقرا وأراقب وأسمع وأطرح وأجمــع
مين الأفضل . . مين الأنفع ميــــــن الأجـدع
والقىَ فضايح و كلام يوجَــع زى المدفـــــــــع
حكايات بتخليــنى أرجَّـــــــع و حاجات أفظــع
ناس تتنازع و لســـــان لاذع
يِخْجَل منه الديــــر والجامــع

الأحزاب نِفــــسى أصدَّقــهُم حد طايـقـــهم ؟
إللى ما حد عِرِف رؤسائهم إيه مبادئهـــم ؟
وَفْـد وغَـد و وطنى خانِقهم ليه يزَهَّــقـهم ؟
و الاخوان فالحين نلاحـقهم فين مخابئهـم ؟
و الفاسدين زيِّ اللى سَبَقهم بَالعِين ريقهم
مين حايغير أمرى الواقـــع ؟

فيه برنامج يقرا الطـالع بَشَّرنا بمستقبـــل لامع ؟
يا كُتَّاب الجيل الطـــــالع إدُّو إجابة لواحد ضايع