فيسبوك
واتساب
خدها منى نصيحة بجد
لو عايز تكون مسرور وسعيد
لو عايز العمر حباله تزيد
معاك الفرصة وموضوع سهل
بادر دايما زُور الأهل
امسح دمعك
ولـِّع شمعك
انسى جراحك
طير فى براحك
انسى الحزن فى كل ماضيك
سيب تكشيرتك فوق الرف
خلـِّى الضحكه تيجى ترفرف
أوعى تخاف من بكرا الجى
قمرك ليلك شمسك ضى
انده تلقى الفرحة تجيك
ازرع وردة لكل حبيبك
ارضى بقدرك حب نصيبك
انسى القسوة حب وسامح
عيش البسمة بكل ملامح
وافتح لهواك الشبابيك
صحـِّى الأمل معاك لونام
اوعى تبطل يوم أحلام
لو مكسور جناح أو ريش
من غير حلم إزاى هتعيش
اوعى اليأس يعشعش فيك
اوعى ظروفك تلعب بيك
انسى كل هموم فى حياتك
ادفن ألمك ويـَّا آهاتك
خلـِّى عزيمه معاك تتشد
الفرحه أكيد هتمد اليد
اعبد ربك صون الفرض
حب الآخر فوق الأرض
ابذر ازرع شجر الخير
صحـِّى ضميرك ساعد الغير
خليك ثابت دوس بالقدم
مش هيفيدك دمع وندم
خلـِّى الضحكة تعوم فى بحورك
تلقى الفرحه أكيد هتزورك
وإيدها بكل حنان تتمد
******
