رامى محمد زين يكتب: تاكسى الجمهورية

يا تاكسى الجمهورية.. ف كل حتة ألاقيك.. سواقك بيناكف فيا.. عايزنى بزيادة أديك..
أجرتك على طول حراقة.. فوق ما يقول العداد.. ولو أرفض تقلب بخناقة.. وساعتها الكوريك سداد..
يا تاكسى الجمهورية.. ف وقت الزحام.. أشاورلك تخلى بيا.. وساعات توقفلى أوام..
ألوانك كتير مغرية.. أبيض وأصفر جنان.. وساعات مزرق شوية.. وده حسب المكان..
يا تاكسى الجمهورية.. بركبك ف المناسبات...لما بقبض المهية.. وأكون شارى حاجات..
أما ف الأيام العادية.. فبركب مواصلات.. عشان على أد إيديا.. ومليا الطرقات..
يا تاكسى الجمهورية.. قانون المرور بيقول.. أركبك وتطلع بيا.. ولا أى كلمة تقول..
وياريت ما تلفش بيا.. وتقولى العداد بيقول.. دى أجرتك النقدية.. وياريت تدفع على طول..
خليك تمام معايا يا تاكسى.. عشان قدام لما العجلة تفسى.. أنزل وأغيرها معاك على طول..
من غير حتى يا عم ما تقول.