فيسبوك
واتساب
أنا مش هكون يافطة نيون
ولا صورة بتزغلل عنين
ولا غرضى إنى أفرد مواهبى ف فاترينات
ولا ناوية إنى أعرض ميزاتى ع الشاشات
ولا مرة هعمل خصم للشارى
ولا حتى عاملة أوكازيونات
أنا أصلى غير كل البنات
الورد كله بيفرد الأوراق ويتباهى بجماله
علشان يشوف كل العيون من دلاله بتنسحر
وأنا وردة لو حست بعين بتميل عليها
تحضن ورقها تلمه فجأة وتستخبى من الخجل
تخفى عبيرها جوة حبة قلبها
لا عايزة حد يغنى فيا أغنيات
ولا نفسى حتى يشبهونى بالقمر
وأنا مش بقول إنى ملاك
ولا إنى شئ غير البشر
لكن طبيعتى وربنا رايد كده
كتير قالولى غريبة ليه متمردة
هو انتى مش م العصر دة
إنتى أكيد مش مننا
لكنى برضه مؤمنة
مهما يقولوا يعيدوا عنى
مستحيل حاقدر أكون
إلا
أنا
