رامى محمد زين يكتب: شوارع بلدنا

يا بلدى ليه شوارعك مكسرة
وبتهد الحيل
وعواميدك فيها الصبح منورة
ومطفية بليل
من ردمك وفحتك
ياما شفت الويل
فكرت أمشى تحتك
أو ألبس حدوة خيل
شوارع رئيسية زى الغيط
طلعت منها بالعربية ع الحيط
وأيام كتير تكسير
وتغيير مسار
ويقولوا تصليح مواسير
نرجو الانتظار
وبعد سنين م الفحت
يتباهوا بالإنجاز
ويرجعوا يحفروا تحت
ويقولوا نسينا الغاز
ولما يخلص شغلهم
يمشوا ف الحال
ومبشوفش حد منهم
ويفضل السؤال
بقايا الفحت مين هيلمها
دى عليت زى الجبال
والحفر المفتوحة مين يسدها
وينقذ العيال
وتعدى علينا سنين
والحال هو الحال
ولا حد م المسئولين
يوم جاوبنا سؤال
طب ليه بعد ما يسفلتوا
ويلموا الردم اللى فات
يكسروا الأسفلت ويفتتوا
ويقولوا توصيل تليفونات
وشوارع على طول زحمة
وكان مفيش إشارة
تقولش بيوزعوا لحمة
ولا إيه العبارة
وشوارع وكبارى زحمة من غير حدود
ساعات بسبب مجارى أو عربية حاضنة عامود
وزبالة البيوت والمطابع
أخدت كتير مساحة
وعملت هرم رابع
وهتنشط السياحة
وكتير قدام بيتنا
ألاقى يافته وإعلان
بتقول نرجو مساعدتنا
منطقه عمل ف المكان
ورجاء الانتباه
فهناك ف الإمام
كسر ف ماسورة مياه
نرجو الالتزام
ولو كنت تمام وشايف إنك بارع
ياريت تشيل المدام لحد أول الشارع