خالد بهجت السيد يكتب: كلام منُه فيه

من كام يوم لقيت خبر عن إن الفنان الكبير أوى أوى هياخد 40 مليون جنيه مصرى عن المسلسل اللى هيقوم ببطولته، وبعدها بكام يوم لقيت خبر تانى عن فنان تانى برضة بس كبير قوى بس مكتوب فيه إنه هياخد 80 مليون جنيه مصرى عن المسلسل اللى هيقوم ببطولته برضه، ولقتنى بقول لنفسى وفيها إيه طب ما بره بياخدو أكتر من كده بكتير ومحدش بينطق بكلمة، وبعدين ما اللعيب اللى معملش أى حاجة لناديه ولبلده طالب 26 مليون جنيه عشان يمضى عقد جديد، والفنانة الشاملة اللى عملت برنامج بيتريق علينا وأتوقف عرضه أخدت 20 ألف دولار عن كل حلقة يعنى 600 ألف دولار عن البرنامج كله، كل ده عادى لأنهم بره بيأخدو أكتر من كده بكتير وبالعملة الصعبة كمان يعنى مثلا جونى ديب واخد 55 مليون دولار عن بطولة الجزء الرابع من سلسلة أفلام قراصنة الكاريبى وأوبرا وينفرى كانت بتاخد 21 مليون دولار أجر شهرى عن برنامجها الشهير، يعنى عندنا أرخص كمان بس اللى مش عادى واللى لازم نقف عنده إن الناس بتوع بره اللى إحنا بنقارن مبينا ومبينهم عندهم ميزانية البحث العلمى السنوية 4 مليار جنيه إسترلينى واللى بتزيد كل سنة إنما عندنا ميزانية البحث العلمى سنويا 30 مليون جنيه مصر، يعنى بحسبه بسيطة نلاقى إنهم ميزانيتهم تساوى ضعف ميزانيتنا 1200 مرة.

يعنى لو عايزين نقلدهم يبقى فى كل حاجة وبما إنه من المستحيل تكون عندنا ميزانية البحث العلمى سنويا 36 مليار جنيه مصرى (4 مليار جنية إسترلينى)، يبقى نطبق نظرية النسبة اللى هى إنهم ضعفنا فى أى حاجة 1200 مرة، يعنى لو عندهم أغلى ممثل بيأخد 55 مليون دولار يبقى إحنا عندنا أغلى ممثل ياخد 275 ألف جنيه مصرى، ولو أغلى مذيعة عندهم بتاخد 30 مليون دولار شهريا، يبقى أغلى مذيعة عندنا تأخد 150 ألف جنية شهريا وهكذا، وبكده هتتعدل حاجات كتير أكيد هيتعدل معاها حال البلد وأهو حتى عشان الناس ميتحرقش دمها بالله عليكم.