فتح عينك حلق حـــــــــــــوش وامسك سيفك متسيبهـــــــوش
واللى يقولك بكرة هاتفــــــرج ارمى وراك متصدقهــــــــوش
كل الغلة خدتها الشلــــــــــــــة وبيدولك كام ملطــــــــــــوش
ويعايروك على ملح ولقمــــــة وعلى العيش اللى مكلتـــوش
ويعايروك لو يدوك حقـــــــــك ويطالبوك باللى مخدتــــــوش
ويخلوك شاهد على باطــــــــل على شىء أصلا محضـرتوش
ويطلبوك بديون فى رقبتـــــــك و يصحوك على حلق حــــوش
وإن عازوا دمك غصبٍ عنـــك وقت العوزة ميخلـــــــــــــوش
وإنت المسئول تحمى قصورهم وتبات تنده مايــــــــــــــردوش
علشان كده خدها نصيحة منــى كبر ضفرك متقصــــــــــــوش
وعلى المبرد سن سنانـــــــــــك وانصح كل اللى مسنــــــــوش
وإن شفت الديب قرب منــــــــك نط ف كرشه متهشــــــــــوش
وإن شفت الحوت لعب ديلـــــــه جزه عشان ميلعبهــــــــــــوش
واقطع رقبة اللى يقولـــــــــــــك إنت ملكش وأخوك ملهـــــوش
وافتح كل دفاتر العزبـــــــــــة شوف كام بند ماقيدُهـــــــــوش
واعرف باعوا بكام ولميـــــــن واعرف ليه باعوا ومقالـــــوش
واسأل ليه بيبيعوا رخيــــــــص واسأل اللى ميتسمـــــــــــــوش
امتى هاتقعد مرة مكانهــــــــــم؟ واسأل ليه قعدوا ومقامـــــــوش
واعرف امتى هاتاخـــــد دورك وتشوف كل اللى مشفتــــــــوش
واللى يناكفك امســـــــــك زوره وافتح كرشه متقفلهــــــــــــوش
......
صورة أرشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة