فيسبوك
واتساب
مالك يا حلوة قايمة شرار؟! بقيتى أميرة فى سوق الخضار
قلنا تلاتة يمكن تروقـى ستة وسبعة دا حاجة مرار
مالك يا حمرة ناسية الحبايب؟ وإمتى هتيجى تزورى الديار؟
ولَّا نويتى تقسى علينــا كإنه معارك بينا وتــار
عايزة تقولى قيمتى كبيرة مانجة طماطم دا نفس المسار
دا انتى يا قوطة جوا قلوبنا أبدا مكانك ما يسكن خيار
جايز وإمكن قالوا "مجنونة" نقدم ونبعت إليكى إعتذار
غندورة بندورة بلاش الأسية طبيخنا بصلصة بيصبح فشار
بنخطب ودادك يا ريتك ترقى يا ما عرايس وسابها القطار
موسم يا شاطرة ولازم تعودى ويشبع بأكلك كبار وصغار
مهرك يا حلوة غالى علينا لحمة وفاتورة وبدفع إيجار
روقى يا طمطم شايفة ظروفنا بلاش القساوة وتـُقـْـل الهزار
