فيسبوك
واتساب
غرقان فى بحر دموعى وهايم
قاعد مكسور الخاطر سرحان
بنتى الأموره الحلوه
ضحكت
ضحكه خلـِّت قلبى اتكهرب
خلتنى أنسى هموم الحزن
خلت قلبى
يرفرف زى الطير الفرحان
صحت فيـَّا الأمل النايم
والحلم الدبلان
ضحكه بريئه فيها كلام
بتعزف على وتر الحب الصادق
وبتنده وتقوللى يابابا
ليه مكشر شيفاك زعلان؟
لازم تضحك
علشان فينا الفرحه تعيش
لازم تهرب من كل الأحزان
بنتى الأموره
شايفه الدنيا بلونها الوردى
مش عارفه إنى ابوها
مشغول بالأسعار الغاليه
والدنيا اللى ما فيها أمان
خايف ع البيت والأسره
خايف من بكرا
خايف واحد منكم
يتعرى يجوع
أو فى طابور العيش يتهان
زحمه وكإنها غابه
وضميرنا بيصرخ فين الإنسان؟
بنتى الأموره ندهت
وبنفس الضحكة وبكل حنان
بتقوللى يا بابا فينك سرحان؟
ربك موجود ودايم
وزمانا هيبقى أحلى زمان
رحت بسرعه ضحكت وقايم
مستغرب
طفله بريئه
بتصحى جوانا الإيمان
