سيبوا الكلام يطلع من بين الضلوع
سيبوه يرقص يغنى
يعزف لحن الحقيقه بصوت مسموع
سيبوه ياخد براحه
يفرد جناحه
يرفرف فى كل الربوع
دا الكلام مشتاق للورق
بيتوحم ع السطور
جوانا الكلام مسجون
بيرفس زى الجنين
عايز يشوف النور
جونا الكلام
بيبكى مش لاقى دموع
موجوع
خايف م العطش الجوع
متكبل بقيود الخوف
متحاوط بألف سور
جوانا الكلام مخنوق
خايف يلاقى القلم مشنوق
يلاقى الورق محروق
لما الكلام يعيش الغربه بين ناسه
تنكتم أنفاسه
ينقتل إحساسه
تجف من حبره العطور
يصبح الإبداع حزين
يندبح نلقاه دفين
شمس الحقيقه تنطفى
وتدوب الشموع
ونتوه ف سكة الجهل
ونغرق فى الضلام
ينكسر مجدافنا
تنكسر كل المراكب والقلوع
ونصرخ فى قلب البحور
لا نقدر نواصل
ولا نعرف رجوع
سيبوا الكلام
يطلع من بين الضلوع
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة