على عبد العزيز يكتب: مصرى بدرجة طالع عينه

بما أننا فى مصر الحبيبة كل يوم تطلع لنا أزمة جديدة أو سرقة جديدة (سرقات من نوع خاص مليار فما فوق) وكمواطنين قاعدين نتفرج بس ونكتم فى نفسنا لغاية ما نموت.

أقترح على الحكومة عمل درجات للمواطنين مثل درجات الوظيفة اللى بنشوفها فى الهيكل الوظيفى وتبدأ هذه الدرجات بمواطن طالع عينه.. ده لسه مولود.. ثم يترقى ويبقى مواطن مفروس.. بعدما يتعلم ويتخرج من الجامعة .. ثم يترقى ويبقى مواطن مفقوع.. بعد ما يشتغل.. ثم يترقى ويبقى مواطن مخنوق.. بعد ما يتزوج..

ثم يترقى ويبقى مواطن معدوم.. بعد ما يخلف عيال.. ثم يترقى ويبقى مواطن الله يرحمه.. بعد ما يموت بغيظه، وبكده نبقى حلينا أزمة مهمة للمواطنين وأصبحوا قادرين على تشخيص حالتهم العقلية والنفسية لنفسهم ولغيرهم ويا سلام لو عملوها على البطاقة الشخصية تبقى حاجة جامدة جدا وكمان الشركات تطلب الناس اللى عاوزاها وفقاً لدرجاتهم الوطنية وساعتها نلاقى إعلانا عن وظيفة يقول مطلوب اتنين مفروسين ومعاهم مرتبة غيظ.

أنت أيه درجتك الوطنية بصراحة؟