محمد سليمان الدوم يكتب: رؤية

البوح بداية الشوف
والشوف
بخروجى عن المألوف
بضم النفس الساكنة الكامنة ف قلب الخوف
بهمّ... حرفينه اتنين
بيكونلنا مراية
لجل القلم مايبوح
بأسراره
اللى مش مسموح له يرويها
غير بس ف الكشاكيل
حواديت كتير
بتملا عينه ذكريات
فاصعب عليه
واملاله حبره بالوجع
لكنى مابدمّعش
بين البكا والخد
فيه ميت حجاب حاجز
وانا نفسى أكون قادر
على نقطتين
يغسلوا كل الخطاوى..
والذنوب
اللى صاغوا كل أشكال المحن
فابدأ أتوب
ويبان لى مكنون الحقيقة
بعد توهة ف الدروب
واضح وضوح صوت جدتى
"تبات مغلوب..... تصير غالب"
أنا مش حزين
أنا آن أوان وقت احتضارى
الموت ملوهشى معنى تانى
غير بس معنى الإنفلات
كل اللى فات
أنا حاسس إنه هيتمحى
بعد ما هخلّص طقوسى
واتحط على آخر مكان
يقبل حقيقى يضمنى
أنا بنحنى
لكل من حاول
يعيش إنسان....... ومات إنسان