الصبر طيب قلنا نصبر
لكن يا عينى الصبر طال
واليأس عاش جوانا يكبر
والأمل أصبح محال
وفى القلوب الحزن عمّر
وع الشفايف 100 سؤال
ياهلترى.. ممكن.. ح نقدر
ح نعدى فى يوم القنال
واللى راح معقول ح يرجع
وللا دا صعب المنال
......................
قالوا خلاص مصر انتهت
والدرس كان قاسى وعسير
لليأس قالوا استسلمت
افرح ياموشى انت ومائير
قالوا الجنون لو فكرت
تتحدى بارليف الخطير
قالوا الدمار ح يكون لها
ولأهلها بئس المصير
وف حقنا وف حقها
كان الكلام علقم مرير
......................
أنا قلت لما الضغط يكتر
ضرورى يحصل انفجار
والليل ساعاته مهما تطّول
لابد يطلع له نهار
ولما الحليم يثور ويغضب
تتحول النظره لشرار
واللى دايما يقول يارب
سكته تفضل عمار
والمصرى لما يقول ياحرب
يرجع وجايب الانتصار
........................
وف اكتوبر وقف الأسمر
وقف الثائر ابن الريف
بكل شجاعة شاور أشّر
ياللا انقضوا على بارليف
ياللا يا مصرى اقهر دمر
هد وحطم بلا تكليف
دوت صيحة الله أكبر
شقت جوف السما كالسيف
خلت فكر العدو يتخدر
وصار النصر لمصر حليف
..........................
خبر العبور كان صدمه
ذهلت عقول الأمريكان
والعالم قال فى دهشة
دا مكنش فى الحسبان
سألوا ديان فى جلسه
إزاى حصل دا وكان
سامى المنياوى
ملحمة العبور
ازاى دا كله يجرى
وكنتوا فين ياديان
قال تعمل ايه الدفة
وهى فى ايد غرقان
........................
وبكل الوفا وبكل الحب
بضمير صافى ما يعرف كدب
بهدى سلامى لأعظم شعب
ست وراجل بنت وشاب
وقت المحنه اتحدوا الصعب
صبروا وصلوا وقالوا يارب
كانوا إيد واحدة عقل وقلب
ويا الجيش على نفس الدرب
حلفوا ما يهدا ويرتاح جنب
إلا إذا راح وانزاح الكرب
...........................
وألف تحية لكل شهيد
ضحى بروحه ف يوم العيد
لاجل مايمحى عار النكسة
لأجل شموع النصر تقيد
فى السما علا جباه الأمة
خط بدمه عهد جديد
عهد ما يعرف نار ولاغربة
عهد سلام نشوان وسعيد
ألف تحية ومليون قبلة
لروح شهدائنا ف أجمل عيد
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة