فيسبوك
واتساب
دم واحد
دم البنيه اللى أُنتهك من شهوه طايشه
زى دم الأبرياء الستة اللى ماتوا
نفس لون دم المسيح
نفس ريحة دم شعبان اللى كان واقف ينفذ تعليمات سيدنا الرئيس
دم واحد
ع الحدود
جوه الصعيد
بنت واحده..100 ولد
أيها السادة الكبار
عيد ميلاد دايما سعيد
استمتعوا وانتوا بتهنوا الفخامه الباباويه
المصالحة فلسطينية
والجريمة جزائرية
والحكاية كل الحكاية فتنه بس طائفية
فتنة فردية يا عالم
أما مصر بخير وصحة
أنت فين يا واد يا تامر
مش مهم تروح لجيشك
المهم تغنى غنوه عاطفية باسم مصر
كلهم بيحبوا مصر
بنت وجدى تغنى لينا أو علينا وجوزها هارب
طب ماكنتى تغنى ليه
قبل أما يسرق بس مصر
وابن طلعت مصطفى
كان بيبنى لمصر مستقبل مُهيب
تحت أقدام الوليه اللهلوبيه
وكله برضه بدم مصر
والمذيعة.. الفظيعة
دخلتنا ما تش كورة بشهدا مصر
آه وسمعنا سينا
راجعة تانى لينا
بس بدل الجندى جابوا.. تكشيره
للاعب باسم مصر
كلهم بيحبوا مصر
وبيعشقوا دم مصر
وكله مص فى دم مصر
دمك انت
دم أنا
دمنا اللى بيتحرق
وبيتشوى فى القطر
ف السكة الحديد
دمنا اللى بيبقى ميَه
ف نص بحر..
فوق سفينة
دم واحد
ما علينا
عيد سعيد
