فيسبوك
واتساب
"خريطة بقلبى أحفظها
وأقدسها
تهاب قدمى تخطيها
أطير بالروح من فوقها
أحضنها.. وأغنيها"
لفيت بلاد العرب أمارس الأحلام
وأبيع فى سوق الأدب
حقيقة مش أوهام
أنا محامى الوطن
لكل عرق وعصب
ولكل ملة ونسب
الحق دينى ويقيني
وسيوفى حروف الكلام
زنج وعرب
بربر وكرد
دفاعى عن الكل
واجب وفرض
من قبل بدء الأمس
عابيتى حامية الشمس
من بطش الظلام
وبدمى طين الأرض
وبعزمى جبال
وأتعابى.. ؟
بحسابى
كفاح نسا وأطفال
وأرواح ملايين رجال
فى بنك التاريخ
وديعة للأجيال..
لفيت بلاد العرب
ناوى على التغيير
فوق عشرين بلد
ولكلها دساتير
بتنص فى صلبها
إن اللى بينها كتير
فى الدم والمصلحة
والقدس والتكبير
وأن الشعوب قصدها
الوحدة تبقى مصير..
أنا محامى الوطن
ومطلبى التقرير
وحدة هوية وعَلَمْ
أو .. تتغير الدساتير!
" خريطة بقلبى أحفظها
وأقدسها
تهاب قدمى تخطيها
أطير بالروح من فوقها
أحضنها.. وأغنيها"
