أحمد حلمى محمد عبد الوهاب يكتب.. النظارة السوداء

ليه يا حبيبى دايماً لابس
نضارة سودا على عينيك

دايماً كده على طول مش عايز
تقلعها وتشوف حواليك

بالنضارة دى هتلاقى
كل الدنيا بقت سودا

ودايماً ماسك فى خناقى
وتبقى الكآبة موجودة

بالنضارة هتشوف الناس
لكن مش على حقيقتهم

دى هتمنع عنك إحساس
بمحبتهم و طيبتهم

دايماً هتشوفهم وحشين
دايماً باصص لعيوبهم

مع إن الناس دول حلوين
و فاتحين للكل قلوبهم

إقلع يا حبيبى نضارتك
و جرب كده هتشوف الفرق

هتلاقى الدنيا بقت جنة
و ساعتها هتحب الخلق

هتشوف الناس كلها حلوة
و بالتأكيد هتحب الكل

هتلاقى الدنيا بقت غنوة
و كل الخير هيجيك و يهل

لما تشوف الناس بعيونك
مش بالنضارة السودا

هتشوف فيهم كل الحلو
و تبقى المحبة موجودة

إوعى تفكر فى عيوبهم
خليك دايماً إيجابى

ربك قالك لو تصاحبهم
راح تصبح من أحبابى


فكر فى عيوبك أنت
وحاول دايماً تغلبها

وساعتها هتكسب أنت
وكل الناس تبقى حبيبها

وهتعيش كده مبسوط فرحان
وربك دايماً راضى عليك

وهتبعد كل الأحزان
وحبايبك دايماً حواليك

فكر يا حبيبى كده بجد
ترمى النضارة السودا

هى سبب كل الأحزان
وبيها سعادتك محدودة

إرميها و ريّح نفسك
وشوف الدنيا بعيونك

هتلاقى أحلى جنة
و ربك يحميك و يصونك

* مهندس نظم معلومات