تقليديا الناس بتقول فى رأس السنة كل سنة وأنتم طيبين أو كل عام وأنتم بخير.... بحاول أقول زيهم ولو من باب المجاملة بس بجد مش قادرة وبقول أسكت أحسن لأن أى طفل عارف أننا لا طيبين و لا بخير أصلا عشان أتمنى نبقى كده كل سنة!
مش بخير من تلوث الهوا و الميه و التربة اللى أصبحت خضرواتها و فاكهتها بتروى بمياه صرف صحى عشان تدى نكهة أطعم للأسمدة المسرطنة اللى حتما بتأثر فينا وسوف تأثر أكتر فى الأجيال اللى جاية.
مش بخير من انتشار الأمراض و الأوبئة...قال كنا ناقصين أنفلونزا الطيور و الخنازير على التوليفة اللى عندنا...بدون ذكر تفاصيل لزوم البعد عن الغم!!!
مش طيبين طول ما فيه ناس بتبات من غير عشا و طول ما فيه عشوائيات.. و لأن الفساد بيزيد كل سنه و الضرائب كمان بتزيد عشان يدعموا من جيوبنا تصدير الغاز لإسرائيل و مش مهم إن ولادنا مش لاقين.
مش طيبين طول ما فيه أبناء لوطنا مضطهدين أو مطاردين أو جعانين أو معتقلين أو ضايعين فى البحر أو البر.
مش طيبين و لا بخير طول ما العمال مشردين...و طول ما السنج و المطاوى فى الشوارع منتشرين...و طول ما فيه فبركة و تزوير و مطبلتيه و كدابين زفة...طول ما فيه طوارىء... و طول ما الحرامى محصن و المستبد مسيطر.
مش طيبين طول ما فيه تحرش و حوادث قطارات و مراكب و انتهاكات و تعذيب فى السجون و المعتقلات ...و طول ما الاستبداد قائم و الفساد سائد...و بلاها سيرة الأزمة الاقتصادية و المشاكل التعليمية أو الكروية السياسية!.....وحاجات تانية كتير تراكمت كحصيلة لخمسين سنة تسلط و مش باينلها مخرج...مش بقولكم كان أحسن اسكت!.....أحسن اسكت لان الدنيا مش ناقصة كآبة ....مادام ماحناش طيبين.....بس صابرين.... يبقى خلينا نقول استرها يا رب و كفاية....بلاوى.
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة