أحمد صلاح محمود يكتب.. فى أوضة الكراكيب القديمة

دخلت أوضة الكراكيب
من زمان قوى ما دخلتش هنا
لقيت ذكريات كتيرة قوى
م الزمن السعيد
لقيت شنطة الشرايط زى ما هى
إيهاب وعمرو وعدوية
ومنير وأغانى حليم الوطنية
ولقيت ورق الجوابات الملون
فى كل ورقة فيه
كلمة بحبك زى ما هى بريئة
وحشنى طعمها اللى غيره الزمن
ياااه
كبرت قوى
وعرفت طعم الحزن
ودوقت المحن
وراحت الضحكة الصافية
وسكن القلب شجن
فين الأيام دى
وفين راحت
وليه بطلنا غناوى
وليه القلب ساكت
والله بحبك يا دنيا
بس انتى اللى قاسية
ادى صور حبيبتى اللى كانت
لسه زى ما هى
وأنا اللى كنت فاكرها ضاعت
زى كتير م الحاجات الحلوة
زى النسمة
وزى الفرحة
أتاريها لسه موجودة
بس القلب هو اللى اتغير
وخلاص على العشق ما عاد له نفس
وما عاد يقدر
ضحكت وقلت بكرة أحب تانى
ويرجع زمن الأغانى
جايز ليه لأ
يمكن
مش كده برضه يا دنيا
قالت أفكر